Framsókn og ESB umsóknin

Framsókn barðist gegn umsókn og aðild að Evrópusambandinu allt síðasta kjörtímabil. Fyrir síðustu alþingiskosningar lofuðu frambjóðendur flokksins því, að umsóknin yrði refjalaust dregin til baka kæmust þeir til valda.

 Framsókn fékk utanríkisráðuneytið til þess að geta stýrt málinu og borið ábyrgð á því að staðið yrði við kosningaloforðin.

Okkur sem stóðum í eldlínunni í stjórnmálum síðasta kjörtímabili er ljóst að barátta Framsóknarflokksins gegn umsókn og aðild að Evrópusambandinu skóp þeim kosningasigurinn vorið 2013. Loforð um skuldaleiðréttingar skiptu máli á lokaspretti kosningabaráttunnar.

Með einarðri andstöðu sinni við umsókna að ESB náði Framsókn til baka meginhluta þess fylgis sem hún hafði áður tapað til Vinstri Grænna  á meðan forysta  þess flokks var trú stefnunni og andstöðunni við inngöngu í ESB. 

Framsókn hafði áður stutt mjög eindregið inngöngu í Evrópusambandið undir forystu Halldórs Ásgrímssonar og var við það að deyja út á þeim tíma.

Vinstri Græn sópuðu til sín fylgi á sama tíma, enda stóðu talsmenn flokksins hvarvetna sem klettur í stjórnmálalitrófinu, heiðarlegir og fastir á grunnstefnunni - flokkur og þingmenn sem hægt var að treysta.

Aðildarumsóknin og Icesave málið bjargaði Framsókn.

Í síðustu kosningum fékk Framsókn til baka fylgið frá Vinstri Grænum og einnig ESB andstæðinga frá Sjálfstæðisflokknum. En þar á bæ treystu ekki allir flokk sínum fullkomlega til að standa við landsfundarsamþykktir um tafarlausa afturköllun umsóknarinnar að ESB. 

Þögn forystumanna beggja ríkisstjórnarflokkanna í áramóta ávörpum um ESB umsóknina kom á óvart.

Vonandi þýðir þögnin það eitt að formennirnir telji svo sjálfssagt  að  ESB  málið verði afgreitt nú á vorþingi.

Varla vill Framsókn upplifa sömu kviðristu("harakíri") á ný og þeir máttu þola undir lok stjórnar Halldórs Ásgrímsonar.

Eins og ESB umsóknin stendur nú er áfram á bak við tjöldin unnið að inngöngu. Ísland er umsóknarríki og lýtur sem slíkt skuldbindingum sínum við ESB.

Óprúttin ESB sinnuð ríkisstjórn getur hvenær sem er sett aðildarferið á fullt á ný. Það getur hún gert án atbeina þjóðarinnar eins og raunin var í ríkisstjórn Samfylkingar og Vinstri Grænna vorið 2009.

Þess vegna verður að afturkalla núverandi umsókn. Þar með verði tryggt  að nýr  aðildarferill verði ekki hafinn nema að fengnum skýrum vilja þjóðarinnar til inngöngu í ESB, sem vonandi verður aldrei.

 

Jórvíkurferð 1. janúar 1992

Mér er minnisstæður 1. janúar, nýársdagur 1992, en  þann vetur dvöldum við hjónin og þrjú yngri börnin í Edinborg í Skotlandi: Páll átta ára, Katrín níu ára og Laufey Erla fjórtán ára. Yfir jól og áramót bættust tvö þeirra eldri, Björg og Ásgeir í hópinn.

Á gamlárskvöld var okkur boðið í mat til kínversks vinafólks okkar, en sá málsverður var ævintýralegur, eftirminnilegur og góður.  Þau kínversku höfðu aldrei séð  svona stóra fjölskyldu eða fengið svo margt  fólk í mat í einu. Við höfðum heldur aldrei fengið svona ekta heimagerða kínverska hátíðarmáltíð áður . Okkur var þó ekki til langrar setu boðið því árla næsta morguns átti að leggja í langferð.

Snemma á nýársmorgun var stefnan svo tekin á lestarferð til Jórvíkur, York í þriggja daga heimsókn til þeirrar fornu norrænu og engilsaxnesku borgar. Ásgeir og Björg höfðu komið til okkar um jólin en Laufey, Katrín og Páll fylgdu okkur í Edinborgardvölinni.  Ferðin byrjaði með því að erfiðlega gekk að fá leigubíl svo snemma morguns, þótt hann hefði verið pantaður deginum áður. Þegar bíllinn  loksins kom og við nærri búin að missa af lestinni, var bílstjórinn mjög úrillur, grauttimbraður og hafði mörg orð um hversu ómannúðlegt það væri að vera kallaður út svona snemma morguns á nýársdag. Vel að merkja þá eru bæði 1. og 2. í nýári frídagar í Skotlandi en á Englandi er aðeins nýársdagur frídagur.

Þegar til York var komið drifum við okkur fyrst á gistiheimili sem við höfðum pantað en það voru þrjú herbergi á einskonar herragarði. Í tveimur herbergjanna  voru stór rúm  og annað með tjöldum á allar hliðar og himni yfir með kögri, plussi og fínheitum. Þetta eru stór ensk rúm sem við sjáum oft í kvikmyndum úr köstulum eða heimilum heldra fólks í enskum bíómyndum.

 Katrín kallaði þetta drottningarrúm  eða prinsessuherbergi og vildi  eindregið  fá að sofa í „himnasænginni“. Annars áttu þau minnstu, Katrín og Páll  að sofa inni hjá okkur gömlu. Niðurstaðan varð hinsvegar sú að við hjónin sváfum í hinu hefðbundna tvíbreiða rúmi.  Björg, Laufey og Katrín, prinsessurnar þrjár sváfu saman í himnasænginni eða drottningarrúminu, en Ásgeir og Páll á einföldum bekkjum í minnsta herberginu.

Gistingin sjálf var öllum ævintýri. Næstu tveir dagar voru nýttir til að skoða víkinga- og sögusafnið í York þar sem Magnús Magnússon var þulur. Var sú skoðunarferð mikil upplifun og varð  ein af góðum kveikjum sem við nýttum síðar í uppbyggingu ferðaþjónustunámsins á Hólum í Hjaltadal.

York er söguborg  frá tímum norrænna manna á Englandi með frægri dómkirkju, verslunum og söfnum.

Við fórum í langan göngutúr á Hadríanmúrnum sem Rómverjar byggðu á sínum tíma til að halda skrælingjum og villimönnum úr norðri, þ.e. Skotum, úti frá hinu rómanska ríki.

Eftirminnilegast var þó pyntingasafnið þar sem settar voru á svið með leikbrúðum og pyntingatækjum allar mögulegar pyntingar á föngum frá fyrri öldum. Var okkur sagt við innganginn að sýningin hentaði líka börnum en okkur leist ekki á blikuna þegar inn kom. Ekki var hægt að snúa við eða stytta sér leið og því farið hratt í gegn og reynt að halda fyrir augu yngstu barnanna, undir ópum kvenna og barna og öskrum karla sem var verið að teygja eða lima í sundur eða þá  hópur nagdýra að hakka í sig.

Á einum stað var María Stuart, fyrrum drottning Skota hálshöggvin á fimm mínútna fresti.

Hugmyndin að þessari sögusýningu  var síðar útfærð með allt öðrum og mýkri  hætti í sérstöku túristaprógrammi á Hólum sem gekk undir nafninu „Draugaröltið“

York er óskaplega falleg borg og okkur mjög náin.  

Þrátt fyrir mikinn sprett í söfn og skoðun fornminja  þessa þrjá daga fann Laufey aðeins tíma til að kíkja í búðir, en hún var þá á unglingsaldri og lét ekki hlunnfara sig um slíkt á svona ferðalögum. Öllu var því til skila haldið.  Ævintýraferð sem okkur er öllum  mjög eftirminnileg  frá fyrstu dögum  í janúar 1992.