ESB umsóknin dauð - Framkvæmdastjóri ESB hafnar aðild Íslands.

Barátta ESB andstæðinga fyrir frjálsu Íslandi hefur skilað árangri. Nýr forseti framkvæmdastjórnar ESB hefur lokað á inngöngu Íslands í sambandið.

Hann telur að framhald umsóknar Íslands muni aðeins skaða innri þróun ESB.

 

ESB stækki ekki næstu fimm árin  

Ísland mun ekki hljóta inngöngu í Evrópusambandið næstu fimm árin

 

Reyndar var furðulegt á sínum tíma að ESB skyldi taka við umsókninni með yfirlýstri andstöðu megin þorra íslensku þjóðarinnar og mikill meiri hluti alþingismanna lýsti sig fyrirfram andvígan inngöngu  í Evrópusambandi.

Það voru aðeins svæsnustu merðir íslenskra stjórnmála í forystuhópi í ríkisstjórnar Jóhönnu Sigurðardóttur sem keyrðu ESB-umsóknina í gengum Alþingi og lýstu sig þar með reiðubúna til að framselja fullveldi þjóðarinnar og yfirráð yfir auðlindum sínum til erlends ríkjasambands.

Sem betur fer voru líka einstaklingar og hópar sem börðuðst hart gegn þessu ferli og lögðu allt undir í þeim efnum til varnar sjálfstæði þjóðarinnar.

Samningaferlið var í raun stöðvað í árslok 2011 þegar því var hafnað að gefa eftir forræði Íslendinga yfir sjávarauðlindinni, eigin matvælaframleiðslu og öðrum náttúruauðlindum þjóðarinnar, Staðið var fast á því að Íslendingar hefðu forræði á samningum á rétti þjóðarinnar í þessum málum á alþjóðavettvangi.

 

Afturkalla á ESB umsóknina formlega og loka Evrópustofu.

Í samræmi við gang mála hjá ESB og vilja Íslensku þjóðarinnar ætti það að vera Alþingi auðvelt að ljúka þessu sorglega máli af sinni hálfu:

 

Mikilvægt er að stjórnarflokkarnir standi við loforð sín og afturkalli  umsóknina að ESB og loki stækkunarskrifstofu Evrópusambandsins hér landi:

 Umsóknin á ekki að liggja eins og hvert annað næturgagn  á skrifstofum í Brüssel sem ESB sinnar geti gripið til þegar þeim sýnist svo.

 

 

Heilbrigðisstofnunum á landsbyggðinni látið blæða út

Leggja á niður fjölda heilbrigðisstofnanna á landsbyggðinni frá 1. ágúst. Ráðningar starfsmanna og þjónusta við núverandi heilbrigðisstofnanir er í fullkominni óvissu og uppnámi.

Skorið hefur verið á allt samráð við heimafólk um skipan heilbrigðismála í héraði. Bæjarstjóri Vesturbyggðar á Patreksfirði kallar framkomu stjórnvalda í heilbrigðismálum Vestfjarða „ruddaskap“. Skagfirðingar segja ráðherra hafi  komið  í bakið á þeim.

Ráðnir verða  sérstakir landshlutaforstjórar frá 1. ágúst  fyrir „nýja stofnun“, hreyturnar af þjónustunni sem eftir verður í fjórðungunum.

Heilbrigðisstofnanir skornar í heilum landshlutum

Ríkisstjórnin hefur tilkynnt  að heilbrigðisstofnanirnar á Blönduósi, Sauðárkróki, Siglufirði, Akureyri og Húsavík verði lagðar niður frá 1. október n.k.  Sú starfsemi sem þá verður eftir á  svæðinu fer undir  "nýja stofnun", Heilbrigðisstofnun Norðurlands frá 1.ágúst,  sem tekur yfir þjónustu við íbúa frá  Austur-Húnavatnssýslu í vestur um Skagafjörð, Eyjafjarðarsýslu , Suður- og   Norður-Þingeyjarsýslur í austur.

Sama er gert með heilbrigðisstofnanirnar frá Patreksfirði til Bolungarvíkur sem verða lagðar af og sameinaðar í eina  á Ísafirði fyrir alla Vestfirði.  Einnig á  að sameina heilbrigðistofnanir á Suðaustur-, Suðurlandi og Vestmannaeyjum í eina.  Ásthildur Sturludóttir sveitarstjóri á Patreksfirði mótmælir kröftuglega en nýlega var sýslumannsembættið þar lagt niður og fært til Ísafjarðar  í nafni hagræðingar og byggðastefnu. Samgöngur eru þó nánast engar milli þessara staða 7-8 mánuði á ári.

Ráðherra óttaðist sveitarstjórnarkosningar

Augljóst er að heilbrigðisráðherra hefur ekki þorað að birta þessa ákvörðun sína fyrir sveitarstjórnarkosningar af ótta við afleiðingar hennar á úrslit þeirra. Nú er langt í næstu kosningar og hægt að haga sér að vild við íbúana.

Í samræmi við fyrri yfirlýsingar úr Skagafirði  er vænst harkalegra mótmæla frá sveitarstjórn Skagafjarðar en ákvörðun ríkisstjórnarinnar um að leggja niður sjálfstæða Heilbrigðisstofnun á Sauðárkróki þykir mikil niðurlæging fyrir ráðherra og þingmenn stjórnarflokkanna í kjördæminu og áfall fyrir íbúana  og nýjan  meirihluta Framsóknar og Sjálfstæðisflokks í  Sveitarfélaginu Skagafirði.

Öðruvísi mér áður brá

Komið var í veg fyrir að hliðstæð áform ríkisstjórnar Sjálfstæðisflokks og Samfylkingar frá árinu 2008 næðu fram að ganga.

Sem ráðherra neitaði ég á sínum tíma að samþykkja tillögur  út úr ríksstjórn Jóhönnu Sigurðardóttur  sem fólu í sér að leggja þessar heilbrigðisstofnanir niður og skerða enn frekar starfsemi þeirra.

Skagfirðingum  ætti að vera það í fersku minni eftir mikinn darraðardans, þegar Ögmundur Jónasson þáverandi heilbrigðisráðherra afturkallaði reglugerð fyrirrennara síns um að leggja Heilbrigðisstofnunina á Sauðárkróki niður og færa stjórnun hennar og starfsemi til Akureyrar. Lýsti Ögmundur því  á yfir sem ráðherra að stjórnvöld myndu aldrei breyta skipan heilbrigðismála í héraði án vilja og samþykkis heimamanna.

Tvískinnungur þingmanna

Mér kemur á óvart að þingmenn Norðvesturkjördæmis skuli standa að þessum aðgerðum gagnvart heilbrigðisstofnunum í þessum landshlutum með skagfirska ráðherrann  Gunnar Braga Sveinsson og  Einar Kristinn Guðfinnsson þingforseta í broddi fylkingar, að ótöldum sérlegum aðstoðarmanni forsætisráðherra, Ásmundi Einari Daðasyni alþingismanni.

Ég minnist málflutnings þeirra og tillöguflutnings á Alþingi þegar þeir voru í stjórnarandstöðu og loforða fyrir síðustu Alþingiskosningar, en þá börðu þeir sér á brjóst og sögðust myndu vaða eld og brennistein til að verja sjálfstæði og þjónustustig þessara heilbrigðisstofnana.

 Nú gefst sömu þesum þingmönnum og ráðherra tækifæri til að standa við  gefin loforð og yfirlýsingar á fjöldafundum með heimamönnunm og verja heilbrigðisstofnanirnar í kjördæminu.

Góð heilbrigðisþjónusta – Líftaug byggðanna

Ég hygg að mörgum Norðlendingnum  finnist mjög að sér vegið af þingmönnum sínum óháð því hvar skrifstofa Heilbrigðisstofnunar Norðurlands verði staðsett.  Við erum minnug þess hve hart var tekist á um heilbrigðismálin fyrir um fjórum árum á fjöldafundum í Skagafirðiog víðar.

Sjálfssagt er að endurskoða ýmsa skipan heilbrigðismála í héraði við breyttar aðstæður en þá ber að gera það að velathuguðu máli og  í nánu samráði við heimamenn.

Rakalaus gjörningur heilbrigðisráðherra

Engin rök hafa verið færð fyrir þessum aðgerðum nú önnur en þau að spara og skera niður þjónustu á landsbyggðinni. Hinsvegar er góð og örugg almenn heilbrigðisþjónusta í nærumhverfi fólks  forsenda fyrir þróun byggðar og jafnræði til búsetu í landinu

Mun réttara hefði verið að gera úttekt á því hvernig til hefur tekist  með uppstokkun og niðurskurð og sameiningu  heilbrigðisþjónustunnar á Austurlandi, Vesturlandi  og víðar á undanförnum árum áður en ráðist væri í nýja óvissuferð með viðkvæma heilbrigðisþjónustu í öðrum landshlutum undir merkjum „hagræðingar“.

Sárt að horfa á heilbrigðisþjónustu landsbyggðarinnar brotna niður

Mér þykir sárt að sjá heilbrigðisstofnanirnar og þjónustu þeirra  á landsbyggðinni  molna niður og blæða út í ákvörðunum stjórnvalda. 

Skorið hefur verið á allt samráð við heimafólk um skipan heilbrigðismála í héraði. Bæjarstjóri Vesturbyggðar á Patreksfirði kallar framkomu stjórnvalda í heilbrigðismálum Vestfjarða „ruddaskap“.

Grípið til varnar  fyrir heilbrigðisþjónustuna!

Mér verður hugsað til þeirra sem studdu Framsókn og Sjálfstæðisflokk til valda í Skagafirði síðastliðið vor. Skagfirðingar hafa staðið saman um að verja Heilbrigðisstofnun sína.

 Þar hlýtur nú að verða tekin upp hörð  vörn fyrir Heilbrigðisstofnunina á Sauðárkróki og ráðherrann látinn afturkalla þessa ákvörðun með svipuðum hætti og gert var  með stuðningi og baráttu heimamanna létum afturkalla ákvörðun sama eðlis í ársbyrjun 2009.

Heilbrigðisstofnanir á landsbyggðinni molna niður og blæðir út í ákvörðunum stjórnvalda 

( Birtist sem grein í mbl., 14.07. 2014) 

Vélráð og hervæðing í Brüssel

Þessar klukkustundirnar er vélað um það milli leiðtoga gömlu heimsvelda Evrópusambandsins  hvernig æðstu embætti innan sambandsins skiptast, hver fær hvaða bitling.

Lítið fer fyrir lýðræðinu í þeim vinnubrögðum.  Meira að segja Bretar eru hafði utangarðs vegna óþægðar sinnar og andstöðu við aukna miðstýringu og samþjöppun valds  til höfuðstöðvanna í Brüssel.  Áhrif  Íslands yrðu fátækleg, ef það væri komið inn í þennan lokaða klúbb.

Í bestafalli fengi utanríkisráðherrann að fylla út í myndatökurammann!

Gagnrýnendur Evrópusambandsins unnu stórsigur í nýafstöðnun kosningum til Evrópuþingsins víðast í Evrópu.

Þeir lýsa harðari andstöðu við þá þróun samþjöppunar valds og andlýðræðislegra vinnubragða sem þar á sér nú stað.

ESB sinnum er órótt  hér á landi  sem annarsstaðar í Evrópu og  reyna að stimpla þessa gagnrýnendur  sem andstæðinga mannréttinda og kalla þá öllum illum nöfnum.

„ Andlýðræðislegt skrímsli“

Þórarinn Hjartarson fjallar um málið í ágætri grein sinni í Fréttablaðinum í gær 

sem hann kallar „Borgaralegt frjálslyndi og alþýðlegt íhald" :

„Ný pólitísk skipting er á milli frjálslyndrar frjálshyggju og íhaldssemi. Það er nær að kenna hina breiðu hægrifylkingu ESB-andstæðinga við "alþýðlegt íhald" en hægri öfgar. Hún snýst nefnilega gegn elítunni. Það má vísast bendla hana við andfrjálslyndi, en ekki andlýðræði. Hún hafnar því afsali lýðræðis og fullveldis sem ESB stendur fyrir, því "andlýðræðislega skrímsli" eins og Marine Le Pen kallar það réttilega“.

 Vísar Þórarinn jafnframt til öfgafullrar og heiftrækinnar umræðu einstakra póltískra afla og fjölmiðla hér á landi  af því tilefni

Hin nýja hervæðing Evrópu

 Vinstri menn hér á landi sem víða í Evrópu hafa áður barist gegn útþenslustefnu Nató og hervæðingu Evrópu . Nú virðist hafa orðið breyting á.  Þeir berjast nú margir  fyrir inngöngu í Evrópusambandið, sem  er á hraðferð til algjörlega miðstýrðs ríkjasambands.

Þá  hervæðist Evrópusambandið nú af kappi og stofnun sameiginlegs hers er á næsta leiti.

Verða það örlög íslenskra krata að kalla Evrópuherskyldu yfir þjóðina.

Utanríkisráðherra Íslands  er vonandi ekki  búinn að tapa endanlega áttum í ESB málin frá því  sem var fyrir kosningar á síðasta ári.

En sú spurning gerist mjög áleitin.

Ferðalög ráðherrans út um heim leysir hann ekki undan verkum sínum , skyldum og ábyrgð hér innanlands.

Mikilvægt er að staðið sé við gefin loforð um að draga umsókn að ESB afdráttarlaust til baka. Það verður að gerast  áður en landið sogast lengra og dýpra inn í það ferli sem virðist á full ferð hér á landi  þvert á gefnar yfirlýsingar stjórnvalda.  

En orð utanríkisráðherra og yfirlýsingar  á fyrsta ári ríkisstjórnarinnar  þóttu lofa góðu, en verða ansi innantómar ef ekkert fer að gerast í þeim efnum.

 

Hvers vegna er Evrópustofu ekki lokað ?

Fyrir ári var því lýst yfir að Evrópustofu yrði lokað frá og með 1. júní 2014. Var sú ákvörðun tekin í kjölfar yfirlýsingar ríkisstjórnarinnar  að viðræðum um aðild að ESB væri hætt og umsóknin yrði formlega dregin til baka.  Utanríkisráðherra var glaðbeittur og víghreifur í yfirlýsingum sínum og þjóðin dáðist að hugrekki og krafti  leiðtogans, sem myndi þvo snarlega burt  smánarblettinn sem umsóknin  svo sannarlega er.

Því miður hefur ríkisstjórnin enn heykst á að efna þau loforð sín. Og nú er upplýst að áróðursmiðstöð Evrópusambandsins, Evrópustofa muni starfa áfram næsta árið a.mk.

Í stað þess að loka hefur starfsemi Evrópustofu  færst aftur í aukanna og nú síðast með sérstöku  kynningarátaki  og áróðursferð um landið.

Eitt meginhlutverk Evrópustofu er samkvæmt eigin skilgreiningu:" vettvangur virkrar umræðu um aðildarumsókn Íslands að ESB, þróun sambandsins og framtíð".

Í hringferðinni um landið er boðið er upp á ókeypis kvikmyndasýningar sérstaklega fyrir börn og dreift merkjum ESB,   húfum   og borðum sem sérstaklega er ætlað fyrir börn.

Evrópustofa er rekin á ábyrgð erlends ríkjasambands og furðulegt ef hún færi leyfi til hópáróðurs meðal barna á Íslandi:

Í fréttatilkynningu frá Evrópustofu segir:

„ Í júnímánuði efna Evrópustofa og Bíó Paradís enn á ný til Evrópskrar kvikmyndahátíðar – en að þessu sinni verður boðið upp á brot af því besta í evrópskri kvikmyndagerð hringinn í kringum landið dagana 1.- 10. júní. Enginn aðgangseyrir verður á hátíðina“.

Hvar fékk áróðursstofnun ESB leyfi til þessa?.

Morgunblaðið tekur Evrópustofu  til umfjöllunar  í leiðara í dag:

"Þó að fyrri ríkisstjórn hafi gert hlé á aðlögunarviðræðunum við Evrópusambandið og núverandi ríkisstjórn hafi framlengt þetta hlé og hafi ekki í hyggju að vinna að áframhaldandi aðlögun, heldur áróðurinn fyrir aðild áfram. Eitt skýrasta dæmið um þetta er sú furðulega ákvörðun að framlengja starfsemi Evrópustofu um eitt ár, en starfseminni átti að ljúka í lok næsta mánaðar.

Evrópustofa hóf starfsemi hér á landi í tengslum við aðildarumsókn Íslands að ESB og er starfrækt í þeim tilgangi að bæta ímynd ESB í hugum Íslendinga og reyna að sannfæra Íslendinga um ágæti ESB og um ágæti aðildar Íslands að ESB. Þetta er með öðrum orðum áróðursskrifstofa.

Áróðurinn er margvíslegur. Fyrr í þessum mánuði stóð Evrópustofa til að mynda fyrir kvikmyndasýningum um allt land þar sem enginn aðgangseyrir var rukkaður en merkjum ESB haldið á lofti. Evrópustofa styrkir líka ýmiskonar starfsemi þeirra háskólamanna sem leggja baráttunni fyrir aðild Íslands að ESB lið og Evrópustofa stendur fyrir hátíðahöldum – vitaskuld einnig með ókeypis aðgangi – á þeim degi sem kalla má þjóðhátíðardag Evrópusambandsins.

Áframhaldandi starfsemi þessarar áróðursskrifstofu er hluti þess vanda að Ísland skuli enn vera umsóknarríki um aðild að Evrópusambandinu. Á meðan sú staða er uppi verður áróðrinum haldið gangandi, jafnt af Evrópustofu sem öðrum áhugasömum um inngöngu Íslands í Evrópusambandið. Eina leiðin til að losna við þennan áróður er að Ísland losni úr þeirri stöðu.

 Landsfundarsamþykkt Sjálfstæðisflokksins var skýr

Á síðasta landsfundi Sjálfstæðisflokksins 21.-24. febrúar 2013 í aðdraganda alþingiskosninga var hinsvegar ályktað mjög afdráttarlaust um að hætta aðlögunarviðræðum við ESB og loka Evrópustofu,  áróðursmiðstöð sambandsins hér á landi:  Orðrétt segir:"

„Landsfundurinn mótmælir íhlutun sendiherra Evrópusambandsins á Íslandi í stjórnmálaumræðu þjóðarinnar og telur óhæfu að stækkunardeild ESB haldi úti starfsemi hér þar sem lagst er á sveif með einu stjórnmálaafli gegn öðrum.  Evrópusambandinu verði gert að loka kynningarskrifstofu þess hér".

Stækkunardeild Evrópusambandsins rekur Evrópustofu en auk þess er Evrópusambandið með eigin sendinefnd og fjölmenna sendiskrifstofu sem að þeirra sögn hefur stöðu sendiráðs og sendiherra í samræmi við Vínarsáttmálann um réttindi og stöðu sendiráða og öll áróðursstarfsemi bönnuð.  

Hvenær ætlar ríkisstjórnin að standa við eigin orð og loka Evrópustofu og draga umsóknina til baka.

Hrafnseyrarræða Illuga

Það er hárrétt hjá Illuga Gunnarssyni menntamálaráðherra að hin umboðslausa ESB umsókn hefur fjötrað umræðuna um þróun samskipta og samtarfs Íslendinga og annarra þjóða utan ESB sem innan. Heimurinn er fyrir Ísland stærri en hinn lokaði klúbbur  27 Evrópusambandsríkja sem stefna að myndun eins sambandsríkis :

„Við Íslendingar verðum að horfa til þessa alls af mikilli alvöru. Við hófum aðildarviðræður við ESB á mjög veikum pólitískum grunni, með klofið þing og klofna ríkisstjórn. Viðræðurnar sigldu í strand á síðasta kjörtímabili og á síðasta þingi var lögð fram tillagan um formleg slit viðræðnanna, sem ekki tókst að afgreiða"., sagði ráðherra í ræðu sinni.

Umsóknin um aðild að ESb er stærsti pólitískur afleikur íslenskra stjórnvalda síðan við fengum fullveldi 1918 og mesta ógn við sjálfstæði þjóðarinnar.  Sem betur fer tókst að afstýra því að samið væri af sér í grundvallar sjálfstæðis og hagsmunum málum þjóðarinnar og samningsferlinu var siglt í strand.

En umræðan var hneppt í fjötra: 

"Því miður hefur umræðan um þessi mál setið föst, hún er í fjötrum þeirrar hugsunar að upplýst umræða geti ekki farið fram án þess að samningur liggi fyrir".

Til þess að losa um þá fjötra lagði  menntamálaráðherra áherslu á að ljúka því máli sem ríkisstjórnin hóf á Alþingi sl. vetur  með tillögu sinni um afturköllun þessarar umboðslausu ESB-umsóknar.

Illugi áttar sig á því að orð duga skammt, það eru verkin sem tala. 

Afturköllun umsóknarinnar 

Það er óþolandi staða að Ísland sé áfram umsóknarríki um aðild að ESB. Með umsóknina inni er umræðan "bundin í fjötra" eins og menntamálráðherra orðar það.

Núverandi umsókn getur ekki haldið áfram nema að Alþingi  breyti þeim fyrirvörum sem það hefur sjálft sett. Enginn þingmeirihluti er nú fyrir slíku sem betur fer.

 Þjóðin á að taka afstöðu fyrirfram um hvort hún vill afsala sér fullveldinu og ganga í Evrópusambandið og síðan er framhaldið, samningagerðin úrvinnsluatriði. Það er vitað hvað er í "pakkanum".

Vonandi er þess langt að bíða að komi meirihluti fyrir því á Alþingi að leggja þá spurningu fyrir þjóðina hvort hún vill afsala sér fullveldinu og ganga í Evrópusambandið.

 

 

Hávær þögn Framsóknarmanna í ESB málinu

Það vakti athygli og furðu að forsætisráðherra minntist ekki einu orði á loforðin um undanbragðalausa afturköllun umsóknar Íslands að Evrópusambandinu. Ættjarðarlögin eins og  "Ég vil elska mitt land"og "Hver á sér fegra föðurland" voru sungin´hvarvetna um landið á 70 ára afmæli Lýðveldisins.  Forsætisráðherra sá þó ekki ástæðu til að  minnast á aðförina að fullveldinu og sjálfsstæði þjóðarinnar sem felst í virkri umsókn, beiðni  um innlimun í Evrópusambandið, hið nýja "Stórríki" Evrópu.

En svo sannarlega er öflug landsbyggð, jafnræði  óháð  búsetu veigamikil forsenda fyrir sjálfstæði þjóðarinnar eins og forsætisráðherra minntist á.

Sjálfsstæðismenn herðast upp ?

Það gerði hinsvegar Illugi Gunnarsson, menntamálaráðherra í hátíðarræðu á fæðingarstað frelsishetju Þjóðarinnar, Jóns Sgurðssonar á Hrafnseyri við Arnarfjörð.

Ræða menntamálaráðherra varí raun í fullu samræmi við tilefnið, 70 ára afmæli  Lýðveldisins Íslands:  Án ræðu menntamálaráðherra hefði ríkisstjórnin farið algjörlega haltrandi og með bogin hné í gegnum 70 ára Lýðveldisafmælið:

...."Við hófum aðildarviðræður við ESB á mjög veikum pólitískum grunni, með klofið þing og klofna ríkisstjórn. Viðræðurnar sigldu í strand á síðasta kjörtímabili og á síðasta þingi var lögð fram tillaga um formleg slit viðræðnanna, sem ekki tókst að afgreiða.
Því miður hefur umræðan um þessi mál setið föst, hún er í fjötrum þeirrar hugsunar að upplýst umræða geti ekki farið fram án þess að samningur liggi fyrir.

Ég tel að það sé mikilvægt að við leysum þessa fjötra og ræðum um og gerum upp við okkur hvort við viljum taka þátt í samstarfi evruríkjanna sem óumflýjanlega mun leiða í átt til sambandsríkis, ef það samstarf á að skila árangri. Ætlum við að hoppa upp í þennan vagninn, vitandi hvert ferðinni er heitið? Viljum við deila verulegum hluta fullveldis okkar með þeim þjóðum sem mynda evrubandalagið? Samrýmist það hagsmunum og sjálfsmynd okkar Íslandinga í bráð og lengd?

Þessum spurningum þarf að svara áður en samnings er leitað og hann veginn og metinn. Svörin við þessum spurningum er hin upplýsta umræða sem þarf að fara fram. Samningur er einungis úrlausnaratriði sem lýtur að því hvernig við síðan tökum upp og aðlögum okkur regluverki ESB eins og það er á þeim tímapunkti sem við óskum inngöngu.

Vitanlega eru þar mikilvæg atriði eins og yfirráðin yfir fiskimiðunum sem án efa ráða miklu um afstöðu alls þorra manna. En grundvallaratriðið hlýtur að vera hvort við viljum verða hluti af sameiningarvegferðinni og ef svar þjóðarinnar við þeirri spurningu er já, þá og þá fyrst fer umræðan að snúast um samning, innihald hans og form" ..:. Andstaða við ESB ekki einangrunarstefna, hvað þá gamaldags þjóðernisstefna

sagði Illugi Gunnarsson  m.a. í ræðu sinni.  En nú sem fyrr eru það þó verkin sem tala og umsóknin hefur ekki verið afturkölluð þrátt fyrir gefin fyrirheit

Afturköllun umsóknarinnar eina svarið 

Eins og staðan er nú hefur Ísland stöðu umsóknarríkis til inngöngu í ESB. Það gefur Evrópusambandinu víðtækt  svigrúm til að reka hér umfangsmikla og eftirlitslausa áróðurstarfsemi, en bindur hendur Íslendinga í þróun utanríksmála á eigin forsendum.

Eins og Illugi Gunnarsson  rekur í ræðu sinni þurfa Íslendingar að hafa frjálsar hendur til að meta kosti og val í samskiptum og samningum við aðrar þjóðir. Þess vegna á að ljúka því verki sem Alþingi hóf sl. vetur og afturkalla formlega og refjalaust umsóknina sem send var um aðild að Evrópusambandinu.

Við þurfum að slíta þá " fjötra" sem ráðherrann talar um að umsóknin hafi hneppt þjóðina í.  

Hér duga ekki fögur orð.  Það eru verkin sem tala.

 

 

 

Frjálst Ísland - Fullvalda þjóð

Lýðveldið Ísland  er 70 ára í dag. Til hamingju !

Fullveldið 1. des 1918, Lýðveldið 17. júní 1944, sigurinn í landhelgisdeilunni og útfærsla fiskveiðilögusögunnar eru hinir stóru áfangar í sjálfstæðisbaráttu íslensku þjóðarinnar.

Stolt okkar, menning, velferð og reisn  er órjúfanlega tengd þessum áþreifanlegu sigrum sem unnust eftir alda langa baráttu.

Á allri þessari  vegferð sjálfstæðis og fullveldis  hafa verið úrtöluraddir og launráð stöðugt brugguð hinu unga Lýðveldi og vegið að því úr launsátri.

Guðmundur Böðvarsson skáld á Kirkjubóli í Borgarfirði orðar það svo í hinu fallega kvæði sínu  „Fylgd“:

„Ef að illar vættir

inn um myrkragættir

 bjóða svikasættir,

svo sem löngum ber

við í heimi hér,

 þá er ei þörf að velja :

 Þú mátt aldrei selja

 það úr hendi þér.

Svikist var aftan að þjóðinni  vorið  2009,  þegar bréf var sent  til Brüssel með  beiðni um inngöngu og  aðild að Evrópusambandinu, framsali á því fullveldi sem íslenska þjóðin hafði barist fyrir öldum saman og sigurinn staðfestur 17. júní 1944.

Sá svika gjörningur  „illra vætta“  eins og skáldið Guðmundur á Kirkjubóli orðaði það,  var ekki borinn undir þjóðina og naut ekki raunverulegs meirihlutastuðnings á Alþingi. Það var svo sannarlega þá vegið að fullveldi þjóðarinnar úr launsátri.

Tafarlaus afturköllun umsóknarinnar að ESB 

Ríkisstjórnin sem nú situr hafði það sem eitt sitt stærsta kosningaloforð að afturkalla  með afdráttarlausum hætti þessa umsókn um aðild  og innlimun í  "Stórríki Evrópu". Út á þau loforð voru þingmenn stjórnarflokkanna  kosnir.

 Þær viðræður sem hafa farið fram  við Evrópusambandið um málið hafa áréttað leitt í ljós,  að með inngöngu myndum við tapa fullveldi okkar, forræði á auðlindum og frjálsum samskiptum við aðrar þjóðir heims.

Forsætisráðherra Sigmundur Davíð Gunnlaugsson,  heldur ræðu á Austurvelli eftir nokkrar mínútur. Hann á góðan kost í varðstöðunni um frjálst og fullvalda Ísland:

Það er að standa við gefin loforð og lýsa því  yfir að umsókn Íslands frá 16. júlí 2009 um aðild og innlimun í   Evrópusambandið verði  þegar í stað formlega og undanbragðalaust afturkölluð ;

"En þú átt að muna,

alla tilveruna,

að þetta land á þig."

Gleðilega hátíð 

 

 

Að standa við orð sín og afturkalla umsóknina að ESB

Nýafstaðnar kosningar til Evrópuþingsins sýna svo rækilega hve Ísland á gott að vera utan þess sambands. Íslendingar bíða hinsvegar enn eftir því að ríkisstjórn Framsóknar- og Sjálfstæðisflokks efni loforð sín um refjalausa afturköllun umsóknarinnar að Evrópusambandinu

Þrátt fyrir mikla tryggð kjósenda við gömlu flokkana sína í ESB –löndunum unnu efasemdarflokkar og andstæðingar Evrópusamrunans stórsigur.

Evrópusambandið í upplausn

Mér blöskrar hinsvegar tal og orðskýringar margra ESB sinnaðra fréttamanna hér á landi sem leyfa sér að kalla fjórðung frönsku þjóðarinnar öfgasinna, jafnvel fasista hvort sem þeir eru til hægri eða vinstri bara af því að þeir styðja flokka sem hafa sterkar efasemdir um ágæti Evrópusambandsins fyrir Frakka. Sjálfur forsetinn, Hollande sem tapaði stórt viðurkennir að „stjórnsýsla ESB sé orðin fjarlæg og illskiljanleg“.

En íslenskir stjórnmálaskýrendur leyfa sér samt kalla nærri þriðjung Breta útlendingahatara af því að þeir styðja flokk sem vinnur stórsigur í kosningum út á stefnu sína að vilja endurskoða aðild Breta að Evrópusambandinu. Og breski forsætisráðherrann hefur í hótun við Merkel að segja sig úr Sambandinu , ef tiltekinn maður verður forseti eða framkvæmdastjóri Evrópusambandsins. Sér nú hver á hvaða stigi málefnaumræðan og brauðfætur Evrópusambandsins eru !

Eru fullveldissinnar öfgamenn?

Við sem höfum í blóðinu hugsjónir og sýn sjálfstæðisbaráttunnar, Lýðveldisstofnunina eða munum landhelgisbaráttuna, höldum sjálfsvirðingu á erlendum vetvangi  er ætlað að sitja undir því að vera kallaðir óvinir jafnaðar og mannréttinda og erindrekar einstaka sérhagsmuna eins og sjávarútvegs og landbúnaðar og fullveldis .

Ég get rakið dæmi um þennan málflutning í útvarpi, sjónvarpi, blöðum og fréttaskýringaþáttum. Hvað með hugtök sem við mörg hver berum virðingu fyrir eins og föðurlandsvini og ættjarðarást, eru þau orðin skammayrði? Sigur ESB andstæðinga í Evrópu virðist kalla fram heitar og jafnvel „öfgafullar“ kenndir ESB sinna í umræðunni hér á landi

ESB- kosningarnar-  Pólitískur jarðskjálfti fyrir Evrópusamandið

Úrslit kosninganna til Evrópuþingsins eru kölluð pólitískur jarðskjálfti fyrir Evrópusambandið.  Íslendingar þekkja hinsvegar vel ógnir jarðskjálftanna og vita að þeir eru ekki eftirsóknarverðir, og fjarri því að vera neitt gamanmál. Jarðskjálftarnir innan Evrópusambandsins eru hinsvegar af mannavöldum og þar hefjast nú hjaðningavíg og leitin að sökudólgunum. Staðreyndin er sú að þrátt fyrir litla kosningaþátttöku unnu frelsissinnar stórsigur í flestum löndum Evrópusambandsins.

Úrslit kosninganna í Evrópu munu fyrst og fremst hafa áhrif innan einstakra aðildarlanda og þar fara hjólin að snúast.

Pólitískt áhrifaleysi einstakra aðildarlanda ESB

Margar þjóðir heldu að lausn á einstökum tímabundnum vandamálum hjá þeim sjálfum fælist í aðild að Evrópusambandinu. Nú vaknar fólk upp við þann vonda draum að það er hið miðstýrða apparat Evrópusambandsins sjálfs sem er vandinn. Fyrst var það efnahagskreppan í Evrópu þar sem byrðunum, skuldunum, var varpað á almenning í jaðarlöndunum. Það hefur Grikkland fengið sárt að reyna enda unnu Syrisia, andstæðingar miðstýringar ESB þar stórsigur.

Það er hið vaxandi pólitíska áhrifaleysi og vanmáttur einstakra þjóða gagnvart miðstýringu og valdþjöppun ESB sem kallar á hörð viðbrögð almennings - jarðskjálftann.

Meira að segja Frakkar, annað öxulveldi Evrópusambandsins gerir uppreisn gagnvart vegferð ESB, hvað þá með minni ríki sem fjarlægari eru höfuðstöðvunum. Cameron hótar úrsögn Ekki er nú límið mikið.

 Sumarþing og afturköllum umsóknina að ESB

Kosningarnar til Evrópuþingsins undirstrika að við höfum ekkert inn í þennan lokaða klúbb að gera. Við Íslendingar viljum vera sjálfstæð þjóð meðal annarra þjóða og ráða málum okkar sjálf innanlands sem og samningum við aðrar þjóðir á eigin forsendum.

Ísland er því miður áfram umsóknaríki að ESB.

Stjórnarflokkarnir lofuðu afturköllun umsóknarinnar. Það er aldrei heilldrjúgt fyrir stjórnmálaflokka að svíkja kjósendur sína í grundvallarmálum.

 Ég hvet til þess að kallað verði til sumarþings þar sem umsóknin að Evrópusambandinum verði refjalaust afturkölluð eins og stjórnarflokkarnir hafa lofað og þingmenn þeirra voru kosnir til.

 ( Birtist sem grein í Mbl. 2. júní 2014)

Heim að Hólum í Hjaltadal

Skagafjörðurinn var sem áður fagur yfir að líta í gærkvöldi. Logn og sjórinn  spegilsléttur svo langt sem augað eygði. Drangey tróndi  eins og drottning fyrir miðjum firðinum með Tindadstólinn á aðra hönd, Málmey og Þórðarhöfðann á hina.

 Frjáls Héraðsvötnin liðu hægt og tignarlega til sjávar og lituðu hafflötinn langt út á fjörð.

Ég keyrði inn Hjaltadalinn og heim í hlaðið á Hólum. Hvert spor snerti viðkvæma strengi og ljúfar minningar rifjuðust  upp frá nær 20 ára skólastjóratíð minni  og okkar Ingibjargar á Hólum. Hér uxu börnin okkar úr grasi og sambúðin með frábæru fólki, nemendum og íbúum mynduðu þetta sérstaka en góða samfélag á Hólum.

Hið helga og tignarlega biskups- og skólasetur er ekki aðeins stolt Skagafirðinga heldur alls Íslands.

Sjálfstæði Hólastaðar 

Sjálfstæði Hóla og sterkur, samstilltur stuðningur heimamanna, héraðsins og stjórnvalda er þó forsenda fyrir stöðu, tign og starfi  staðarins á hverjum tíma.

Biskupssetri og skóla var lokað eftir aldamótin 1800, en skólinn endurreistur í nýrri mynd árið 1881, en þá ríktu mikil harðindi í landinu og fólksflutningar til Ameríka. Endureisn Hóla þá var viðspyrna  Norðlendinga við erfiðum kjörum fólks og sókn til framtíðar. Að hefja Hóla til vegs á ný var veigamikill þáttur í fullveldisbaráttu þjóðarinnar.

Hin nýja endurreisn Hóla 

Skólanum var þó því miður  lokað 1978,  mest vegna afskiptaleysis stjórnvalda og undir merkjum "hagræðingar í skólamálum" sem þá var í gangi.  Skagfirðingar og Norðlendingar allir létu þá ekki bjóða sér þessa framkomu og skólinn var aftur endurreistur 1981. Ég var svo lánmsamur að fá verkefnið að stýra þeirri endurreisn, sem tókst vel . Hólar í Hjaltadal  hafa vaxið og dafnað samfellt síðan.

Það var mikill sigur að fá biskupssetrið aftur heim að Hólum og mér finnst það eigi að vera bundið í lögum að bæði biskup og rektor skólans hafi fasta búsetu á Hólum og rektorinn sé jafnframt ábúandi Hólajarðarinnar fyrir hönd ríkisins. Þannig var það í minni tíð á staðnum.

"Hagræðing kontórista fyrir sunnan" versti óvinur Hóla 

En svo sem oft áður eru það ekki hallæri og þjóðflutningar sem eru verstu óvinir Hóla Í Hjaltadal, heldur eru það skilningslaus og metnaðarlítil stjórnvöld sem eru ógn staðarins.

Blinduð og þröngsýn hagræðingarkrafa skekur enn á ný starfsumgjörð Hóla. Sama "hagræðingarveiki"  stjórnvalda er nú   að kyrkja systurstofnun Hólaskóla, Hvanneyri í Borgarfirði. Núverandi stjórnvöld virðast ætla með góðu eða þó helst illu að loka Hvanneyri sem skólsetri og leggja starfsemina undir stofnanir í Reykjavík.

Það þarf hug og bein hné fyrir Hóla í Hjaltadal

Sama hótun og sama svipa vofir yfir  Hólum í Hjaltadal. Hagræðingin er skipulögð á skrifborðum fjarlægra kontórista í Reykjavík sem metnaðarlitlir stjórnmálamenn fylgja eftir í blindi.

Ég kynntist vel þessum öflum sem skólastjóri, þingmaður og ráðherra og átti oft beinan þátt í að stöðva framgang þeirra og snúa málum til betri vegar fyrir skólastaðina.

Ég hef áhyggju af framtíð Hóla og "hagræðingarbrölti" stjórnvalda. Ég  hvet ráðherra og þingmenn kjördæmisins til þess að sýna meiri metnað og stuðning við skólasetrin á Hólum og Hvanneyri en nú  virðist í boði.

Hugur og barátta heimamanna ræður einnig hér miklu um. Nú eru sveitarstjórnarkosningar á  næsta leiti.  Mér verður þvi  á þessari stundu hugsað til Hóla í Hjaltadal. 

 

 

 

ESB - fjarlægt og illskiljanlegt Frökkum

 Mér blöskrar tal fréttamanna hér á landi sem leyfa sér að kalla þriðjung  frönsku

þjóðarinnar öfgasinna og  jafnvel fasista af því að þeir styðja flokk sem hefur sterkar

efasemdir um vegferð Evrópusambandsins og  ágæti þess fyrir Frakka.

Sjálfur forsetinn Hollande, sem tapaði stórt viðurkennir að „stjórnsýsla ESB sé orðin

fjarlæg og illskiljanleg“ og krefst breytinga Vill að ESB dragi úr ítökum sínum .

Er þriðjungur Breta útlendingahatarar? 

David  Cameron, forsætisráðherra Bretlands viðurkennir ósigurinn og  Seg­ir Evr­ópu­sam­bandið of ráðríkt .  Cameron kallar eftir breytingum á ESB

En íslenskir ESB-sinnaðir stjórnmálaskýrendur leyfa sér samt að  kalla nærri þriðjung Breta útlendingahatara af því að þeir styðja flokk sem vinnur stórsigur í kosningum út á stefnu sína um sjálfstætt Bretland og vill að  Bretar segi sig úr  Evrópusambandinu.(Evrópa yfirgefi Evrópusambandið  )

Reyndar er stór hluti kjósenda Íhaldsflokksins sömu skoðunar. 

  Miðöxulveldi Evrópusambandsins með leiðtoga Frakklands og Þýskalands í

fararbroddi höfðu deilt um  það innbyrðis á sinn ólýðræðislega hátt, hver  úr þeirra

röðum yrði næsti forseti  framkvæmdastjórnar Evrópusambandsins.

Nú er það baktjaldamakk upp í loft eftir úrslit kosninganna. Úrslit kosninganna til

Evrópuþingsins undirstrika pólitíska kreppu sambandsins og vonbrigði

aðildarþjóðanna með vegferð þess.

Afturköllum umsóknina eins og lofað var 

Við á Íslandi megum fagna því að vera ekki aðilar að þessu " fjarlæga og illskiljanlega"

 bandalagi  Hollande og Merkel. Brýnt er að ríkisstjórn Íslands og Alþingi gangi hreint

til verks og afturkalli umsóknina að Evrópusambandinu eins og hefur verið lofað.