Hlustað á heimamenn - traustur heilbrigðisráðherra

Ögmundur Jónasson  heilbrigðisráðherra hefur nú heimsótt flestar heilbrigðisstofnanir á Norður- og Vesturlandi síðustu daga. Þar hefur hann rætt við og hlustað á  starfsfólk, sveitarstjórnarmenn og annað heimafólk um framtíðarstöðu þessara mikilvægu stofnana í heimabyggð. Þannig á að vinna.

Heilbrigðisstofnunin á Patreksfirði áfram sjálfstæð

Fyrrverandi heilbrigðisráðherra, Guðlaugur Þór Þórðarson vildi sundra núverandi skipulagi heilbrigðisþjónustunnar og sameina stofnanir í fjarlægum landshlutum  með boðvaldi. Þannig hafði hann boðað að leggja skyldi niður heilbrigðisstofnunina á Patreksfirði og sameina hana stofnuninni  Ísafirði. Landleiðin þar á milli um Dynjandisheiði og Hrafnseyrarheiði er þó lokuð vetrarmánuðina og verður þá annað hvort að fljúga þar á milli í gegnum Reykjavík  eða aka um Barðaströnd, yfir Laxárdalsheiði, norður Strandir um Steingrímsfjarðarheiði til Ísafjarðar.

Ég mótmælti þessari ákvörðun fyrrverandi heilbrigðisráðherra harðlega:   Það sér hver heilvitamaður hve lítið vit er í að slá saman í eina stjórnunareiningu þjónustustofnunum íbúanna  undir slíkum landfræðilegum skilyrðum og gegn vilja heimamanna. 

Rétt er að taka fram að góð samvinna er á milli heilbrigðisstofnananna á  Patreksfirði og Ísafirði sem og við aðrar heilbrigðisstofnanir. Það góða samstarf má vel þróa áfram, öllum aðilum til hagsbóta. Jafnframt er mikilvægt  að  standa vörð um og  efla Heilbrigðisstofnun Vestfjarða á Ísafirði. Gott starf hennar  eykur öryggi og þjónustu allrar heilbrigðisþjónustu í Fjórðungnum.

Þjónustan varin

Hinsvegar ef Heilbrigðisstofnunin á Patreksfirði hefði verið lögð niður sem sjálfstæð stofnun eins og ríkisstjórn Sjálfstæðisflokks og Samfylkingar ætlaði hefði  heilbrigðisþjónustan á sunnanverðum Vestfjörðum  þar með verið sett í uppnám og öryggi íbúanna skert . „Hvorki á Patreksfirði né Ísafirði komu menn auga á hagræðið af slíkri stofnanalegri sameiningu“, segir Ögmundur í viðtali við Morgunblaðið í dag. “Menn töldu hinsvegar  að það væri vænlegra að vinna að því markmiði  að ná fram hagræðingu  án þess að sameina stofnanir. Þar sem þetta er vilji heimamanna og niðurstaða sem þeir komast að að  yfirveguðu ráði  þá ákvað ég að þessi sameining yrði slegin út af borðinu.“

Heimafólki létt

 Heimafólki á sunnanverðum Vestfjörðum, á Patreksfirði, Tálknafirði og Bíldudal er örugglega létt við þessa ákvörðun.  Ég fagna því hve hinn nýji heilbrigðisráðherra okkar Vinstri grænna, Ögmundur Jónasson tekur fast og örugglega á heilbrigðismálunum  með heimafólki.