Einhliða myntskipting - valkostur fyrir Íslendinga ?

Sú hugmynd að skipta einhliða um mynt – dollar – evru- norska króna-  án þess að gerast aðili að viðkomandi  ríki eða ríkjasambandi er afar athyglisverð.  Ljóst er að það mun þurfa gríðarlega fjármuni til að setja krónuna  aftur á flot og búa til gjaldeyrismarkað  fyrir hana á ný . Sú aðferð  að koma krónunni aftur á markað er líka afar áhættusöm og óvist að hún takist. Margur spyr sig nú er það áhættunnar virði. 

Ýmis önnur smáríki hafa í krafti neyðarréttar gripið til slíkra aðgerða  og tekið upp aðra mynt án þess að fá fyrirfram samþykki viðkomandi landa eða ríkja.

Ýmis rök benda til að fyrst ætti að skoða dollar og tengingu við Bandaríkin í gjaldeyrismálum þar sem  um einn  samstarfsaðila væri um að ræða frekar en evru þar sem  að  ESB - löndin eru   um þessar mundir býsna sundurlaus innbyrðis.

Þá myndi og krafan um aðild að Evrópusambandinu  og  uppgjör risaskulda  einkaaðila eins og bankanna við einstök ríki sambandsins   getað torveldað samninga  og samstarf við þau lönd í einhliða upptöku Evru. 

 Að sjálfsögðu er svo norska krónan  valkostur  ekki síst þar sem bæði ríkin eru í EFTA en utan ESB.  

Aðild að Evrópusambandinu kemur hvort eð er ekki til greina við núverandi aðstæður í efnahagsmálum  og langt í land að við myndum uppfylla inntökuskilyrðin  í ESB  þó svo það yrði ofan á að sækja um aðild, nokkuð sem ég mæli alls ekki með.

 Skipti  úr krónu í dollar gæti alveg eins verið  hlutlausari og einfaldari aðgerð  en skipti  í evru, ef ávinningurinn af myntbreytingunni  á annað borð yrði meiri en af óbreyttri krónu.

 Einhliða upptaka annarrar myntar í krafti neyðarréttar  í stað krónunnar er   valkostur sem ber að skoða mjög vandlega.