Sjálfstæðismenn óttast þjóðaratkvæðagreiðslur

 „Sjálfstæðismenn,  gráir fyrir járnum eru hræddir við þjóðina“ sagði Atli Gíslason þingmaður Vinstri -Grænna og fulltrúi VG í stjórnarskrárnefnd í kastljósi í kvöld.  Öllum er ljóst að Sjálfstæðisflokkurinn óttast hið beina lýðræði og vald fólksins sem felst í þjóðaratkvæðagreiðslum.  Þess vegna leggjast þingmenn flokksins  í málþóf á Alþingi og reyna  að koma í veg fyrir að nauðsynlegar breytingar á stjórnarskránni verði samþykktar.

Þingmenn VG leggja þunga áherslu á að þessar brýnu stjórnarskrárbreytingar nái fram að ganga.

 Meginefni frumvarps til stjórnskipunarlaga, sem tekist er á um og Sjálfstæðisflokkurinn óttast felur í sér 4 meginatriði:  

1.     Náttúruauðlindir sem ekki eru háðar einkarétti séu þjóðareign og þær má ekki selja eða láta varanlega af hendi.

2.      Breytingar á stjórnarskrá skal bera undir þjóðina í sjálfstæðri þjóðaratkvæðagreiðslu, en ekki sem hluta af almennum þingkosningum  eins og nú er.

3.     Tiltekinn hluti þjóðarinnar geti með undirskrift krafist þjóðaratkvæðagreiðslu um ákveðin stórmál, en sá  réttur er ekki nú fyrir hendi.

4.     Ákvörðun um að boðað skuli til sérstaks tímabundins  stjórnlagaþings sem hafi það hlutverk að endurskoða stjórnarskrána og aðra umgjörð lýðræðisins.

5.     Frumvarp að nýrri stjórnarskrá skal borið undir þjóðina í sérstakri þjóðaratkvæðagreiðslu.  

-  Í umræddum kastljósþætti  á miðvikudagskvöldið,  benti Atli Gíslason á að sl. haust varð ekki einungis efnahagshrun  sem dundi á þjóðinni heldur einnig lýðræðishrun. 

 18 ára samfelld stjórnartíð  Sjálfstæðisflokksins hefur gengið afar nærri efnahags- og lýðræðisstoðum samfélagsins.

 Búsáhaldabyltingin svonefnda  sem átti stærstan hlut í að hrekja Sjálfstæðisflokkinn frá völdum  krafðist lýðræðis. 

 Almenningur kallar á aukið lýðræði og beina aðkomu þjóðarinnar að stærri málum.   Hinsvegar virðast sjálfstæðismenn óttast lýðræðið, þjóðina og beint vald hennar.   

 En  sú hræðsla þingmanna Sjálfstæðisflokksins kemur þó  fæstum á óvart þegar litið er til stjórnarhátta  hans  undanfarin 18 ár.  

Þjóðin krefst lýðræðis og það er skylda alþingis að koma til móts við þessar réttmætu kröfur.