Íslenskt- Já takk ! Hvatning frá norrænum félögum.

 

 Miklar vonir eru nú bundnar við eflingu íslensks landbúnaðar, matvælavinnslu og fjölþættar ferðaþjónustu sem byggir á hreinní  náttúru og afurða sem henni tengjast. Þeir sem áður höfðu öll horn í síðu innlends landbúnaðar -  vildu afskrifa hann og opna fyrir hömlulausum innflutningi kjötvara -  sjá nú hversu atvinnu- og fæðuöryggið skiptir þjóðina miklu máli.

Það var því mjög ánægjulegt  að fá  í dag hvatningu og stuðningsyfirlýsingu frá bændasamtökum  hinna Norðurlandanna. Hér kveður við nokkuð annan tón en hjá  ríkisstjórn Samfylkingar og Sjálfstæðisflokks sem hefur sem sitt nánast eina mál varðandi íslenskan landbúnað að leyfa óheftan innflutning á hráu kjötmeti frá ESB sem myndi á skömmum tíma rústa íslenskum  matvælaiðnaði og fæðuöryggi þjóðarinnar:

 

Stuðningsyfirlýsing frá norrænum bændasamtökum

 

"Stéttarsystkin íslenskra bænda í Danmörku, Svíþjóð, Finnlandi og Noregi hafa fylgst náið með framvindu efnahagsniðursveiflunnar sem orðin er á Íslandi. Við sjáum að áhrifin bitna á öllu samfélaginu og að erfiðir tímar eru framundan.

 

Við viljum því lýsa yfir sérstakri samstöðu með íslenskum bændum og leggjum áherslu á hið nána og góða samstarf sem að við eigum innan miðstjórnar norrænu bændasamtakanna, NBC. Á erfiðum tímum er samstaða sérstaklega mikilvæg til að unnt sé að hafa nauðsynleg áhrif á stjórnvöld, þannig að baráttan skili sem mestum árangri. Við viljum einkum benda á eftirfarandi atriði sem við teljum nauðsynlegt að íslensk stjórnvöld leggi áherslu á:

 

• Við þær aðstæður sem nú ríkja hefur það úrslitaþýðingu að tryggja íslenskum bændum nauðsynlegt tímabundið rekstrarfé en einnig þarf að tryggja langtíma fjármögnun svo hægt sé að halda uppi matvælaframleiðslu og að eigin búvöruframleiðsla Íslendinga, sem er takmörkuð fyrir, skerðist hvorki né skaðist.
• Undirstrika þarf nauðsyn þess að íslenskir bændur geti haldið uppi framleiðslu til að tryggja atvinnusköpun í mikilvægum hluta atvinnulífsins sem verður að halda gangandi óháð sveiflum í efnahagslífinu. Íslenski bóndinn og innlend matvælaframleiðsla geta gegnt mikilvægu hlutverki fyrir íslenskt samfélag í því uppbyggingarstarfi sem framundan er.
• Við skorum á íslensku ríkisstjórnina að skapa traustar aðstæður til framtíðar fyrir bændur og landbúnaðinn sem tryggi matvælaöryggi þjóðarinnar. Greinin verður að fá nægjanlegt fjármagn til að komast í gegnum yfirstandandi kreppu.

 

Norrænir bændur vonast til að íslenska ríkisstjórnin fylgi tilmælum okkar og sjái til þess að Ísland eigi traustan og lifandi landbúnað í framtíðinni. Landbúnaðurinn er mikilvægur og órjúfanlegur þáttur sameiginlegrar norrænnar landbúnaðararfleifðar og hefðar.

 

Með kveðju,

 

F.h. Landbrugsraadet,                                                                      F.h. MTK,      

(dönsku bændasamtökin)                                                                 (finnsku bændasamtökin)

 

Peter Gæmelke                                                                                 Michael Hornborg

  

F.h. LRF,                                                                                          F.h Norges Bondelag,
(sænsku bændasamtökin)                                                                 (norsku bændasamtökin)

 

 

Lars-Göran Petterson                                                                        Pål Haugstad             

 

F.h SLC,
(samtök sænskumælandi bænda í Finnlandi)

Holger Falck