Niðurskurður á heilbrigðisstofnunum. Ráðherra segir ósatt á Alþingi!

 

  “Subject:  Áríðandi!  Óskað er eftir tillögum frá stofnunum um a.m.k. 10% niðurskurð frá fjárlagafrumvarpi 2009 sem senda skal ráðuneytinu eigi síðar en á þriðjudag 18. nóvember nk. “ 

Þannig hljóðar tölvupóstur sem heilbrigðisráðuneytið sendi frá sér á allar undirstofnanir sínar 14.nóv. sl. 

  „ Það er alveg ljóst að það er ekki um að ræða neinn flatan niðurskurð í mínu ráðuneyti, það hefur aldrei staðið til.  Ríkisstjórnin mun gera allt sem hún getur til þess að verja velferðarkerfi okkar og halda uppi þjónustustigi, sérstaklega í heilbrigðismálum“, 

sagði Guðlaugur Þór Þórðarson heilbrigðisráðherra á Alþingi dag.

 Að kröfu Alþjóðagjaldeyrissjóðsins 

Fjármálaráðuneytið sendi 14.nóv. sl. bréf til allra ráðuneyta þar sem þess var krafist að allar undirstofnanir þeirra  skiluðu  fyrir  20.nóv.  útfærðum tillögum „ um lækkun útgjalda sem nemi a.m.k. 10%  af veltu  miðað við fjárlagafrumvarpið 2009.“  Í bréfi  fjármálaráðuneytisins sem er tvær þéttskrifaðar síður er vitnað til „ þeirra  áfalla sem dunið hafa yfir fjármálakerfi landsins undanfarnar vikur og til þess að fylgja áætlunum um viðreisn efnahagslífsins  með aðstoð Alþjóðagjaldeyrissjóðsins ( IMF) og annarra erlendra aðila“. 

 Augljóslega er það  Alþjóðagjaldeyrissjóðurinn sem  krefst niðurskurðar í heilbrigðiskerfinu og að kostnaðinum sé velt yfir á sjúklinga. Það hefur sjóðurinn gert hvar sem hann kemur að. Hitt kemur kannski ekki heldur á óvart hve ljúflega ríkisstjórnin beygir sig undir kröfur sjóðsins um niðurskurð í velferðkerfinu,  þvert á yfirlýsingar um hið gagnstæða.

 Umrætt bréf fjármálaráðuneytisins var sent út án nokkurs samráðs við Alþingi eða fjárlaganefnd. En fjárlagavinnan er nú í höndum Alþingis.  Og þrátt fyrir ítrekaðar óskir hefur fjármálaráðuneytið ekki viljað afhenda  nefndinni afrit af bréfinu með umræddum tilskipunum. 

 Bréf Heilbrigðisráðuneytisins til allra stofnana sinna, 14. nóv:

 “Subject:  Áríðandi!  Óskað er eftir tillögum frá stofnunum um a.m.k. 10% niðurskurð frá fjárlagafrumvarpi 2009 sem senda skal ráðuneytinu eigi síðar en á þriðjudag 18. nóvember nk. “ 

Komiði sæl.

Eins og ykkur öllum er ljóst er íslenskt efnahagslíf í alvarlegum vanda. Meðfylgjandi er bréf sem ráðuneytinu barst fyrr í dag þar sem farið er fram á að útfærðar verði tillögur um lækkun útgjalda sem nemi a.m.k. 10% af veltu miðað við fjárlagafrumvarpið 2009.

Eins og fram kemur í bréfinu á ráðuneytið að skila inn útfærðum tillögum í fjárlagakerfið í síðasta lagi fimmtudaginn 20. nóvember nk.

Tillögur ykkar verða að berast ráðuneytinu í síðasta lagi þriðjudaginn 18. nóvember nk.

Með góðri kveðju og gangi ykkur vel,

Hrönn" 

Ekki rætt um flatan 10 prósenta niðurskurð í heilbrigðisráðuneyti

MYND/Auðunn

Guðlaugur Þór Þórðarson heilbrigðisráðherra segir ekki rætt um flatan tíu prósenta niðurskurð í heilbrigðisráðuneytinu og að ríkisstjórnin geri allt sem hún geti til þess að verja velferðarkerfið, þar á meðal heilbrigðisþjónustuna.

Þetta kom fram í svari ráðherrans við fyrirspurn Þuríðar Backman, þingmanns Vinstri - grænna, í fyrirspurnartíma á Alþingi í morgun. Vísir, 21. nóv. 2008 11:36

Ósannindi ráðherra

Heilbrigðisstofnanir sem margar berjast við mikinn rekstrarvanda urðu forviða yfir þessari kröfu ráðuneytisins sem þær áttu að svara innan þriggja daga. Og enn meira hissa urðu forstöðumenn þeirra að heyra í heilbrigðisráðherra fara vísvitandi með ósannindi á Alþingi í dag.

Hvað á að gera við slíkan ráðherra?   Er að furða þó flutt sé vantraust á ríkisstjórnina?