Engin áhrif á forsendur fjárlaga !!!

Geir Haarde fullyrti í Kastljósþætti að kaup ríkisins á Glitni fyrir 84 milljarða hefði ekki áhrif á forsendur fjárlaga!  Þótt sumir vorkenni Geir að sjá grunnstefnu Sjálfstæðisflokksins undanfarin 17 ár í ríkisstjórn fara í vaskinn, verður hann að sjá samhengi hlutanna. Einkavæðing og blind markaðshyggja undir  forystu Sjálfstæðisflokksins verður ekki framlengd.

 Að sjálfsögðu er það ríkissjóður sem ábyrgist gjaldeyrisvarasjóð Seðlabankans sem og aðrar eigur hans.  Og þann forða getur þurft að endurnýja  og ríkið verður að  greiða  kostnaðinn sem af því hlýst.   Þó Seðlabankinn hafi ef til vill  heimildir til að ráðstafa fé sínu með þessum hætti þá þýðir það ekki að þessi aðgerð hafi ekki áhrif á stöðu ríkissjóðs og forsendur fjárlaga. Það er einmitt þessi veruleikafirring um áhrif einstakra aðgerða á forsendur fjárlaga sem ríkisstjórn Sjálfstæðisflokksins hefur verið svo blind fyrir.

Ákvarðanir um nýjar risa- stóriðjuframkvæmdir sem voru allt of stórar fyrir íslenska hagkerfið og hafa nú sett það á slig,  áttu að sögn aldrei að hafa áhrif á forsendur fjárlaga!  Skattalækkanir á hátekjufólki áttu ekki að hafa áhrif á forsendur fjárlaga osfrv.  Þess vegna hafa fjárlögin verið meira eða minna marklítið plagg  eins og raun ber vitni.   

Kemur Alþingi ekkert við!

Og  Geir Haarde bætir við í umræddum Kastljósþætti: „ en síðan munum við á komandi þingi afla okkur þeirra lagaheimilda sem nauðsynlegar kunna að vera  ef þess gerist þörf“!-   Er  forsætisráðherra að segja að Alþingi  komi  ekkert við stærstu einstök  kaup og skuldbindingar í sögu íslenska ríkisins?  Ætlaði hann sér að hafa selt bankann áður en þing kæmi saman?

Því miður hefur þetta um langt skeið verið viðhorf ráðherra Sjálfstæðisflokksins til fjárlaga og aðkomu þingsins. Enda  ríkir hér ráðherraræði.  Sannleikurinn er sá að áhrif kaupanna eru þegar farin að koma fram í gengi,  lánshæfismati, skuldatryggingaálagi og vaxtagjöldum ríkissjóðs, nokkrar af grunnsforsendum  fjárlaga.

Fjárreiðulög kveða skýrt á um aðkomu Alþingis

Samkvæmt fjárreiðulögum verður að bera öll meiriháttar kaup og sölu eigna og hlutafélaga  í fyritækjum undir Alþingi annað hvort á fjárlögum eða á fjáraukalögum.  Kaup á 75% hlut Glitnis  eru þau stærstu sem íslenska ríkið hefur gert og þau kaup verða aðeins gerð með fyrirvara um samþykki Alþingis, liggi lagaheimild ekki fyrir. Eðlilegast er að beiðni um heimild fyrir þessum kaupum komi inn sem sérstakt frumvarp frá ríkisstjórninni og  þar verði jafnframt kveðið nánar um á hvern hátt þessi nýi ríkisbanki eigi að starfa.  Með sama hætti verður ríkissjóður að sækja  heimild  til Alþingis til þess að mega hefja söluferli á hlut sínum og þá fer málið í feril sem Alþingi ákveður. Má minna á að flutt var sérstakt frumvarp um sölu á bönkunum  og Landsímanum á sínum tíma og voru þá minni upphæðir á ferðinni.

Umræða um sölu á hlut ríkisins í Glitni lögleysa og út í hött

Hér er ekki verið að leggja mat á réttmæti þessara kaupa á Glitni heldur er verið að undirstrika að forystumenn þjóðarinnar sem nú eru að véla um svo afdrifaríkaríkar aðgerðir átti sig á lýðræðislegu samhengi hlutanna. Öll orðræða af hálfu forsætisráðherra um sölu á hlut ríkisins til Landsbankans eða annarra  án heimildar Alþingis, er því bein lögleysa og út í hött og skapar aðeins aukna óvissu á fjármálamarkaði.