Stórmannlegar uppsagnir á Vestfjörðum!

Þær eru metnaðarfullar sparnaðaraðgerðir Sparisjóðs Keflavíkur sem birtast okkur þessa dagana. Skera skal  niður 3,5 stöðugildi á Vestfjörðum og stytta opnunartíma og loka alveg afgreiðslunni á Borðeyri !

Ekki veit ég hvað  það starfsfólk hefur í laun sem hér er verið að segja upp, en varla hefur það sett sparisjóðinn á slig. Hinsvegar munar um hvert starf á Vestfjörðum og þjónustustigið skiptir miklu máli.

Allt er þetta eftir bókinni : Þegar stjórnun og ábyrgð færist úr héraði til manna sem búa í fjarlægum landshlutum þá er fyrst gengið á þá sem fjærst búa.

Sparisjóður Keflavíkur er ekki einsdæmi hvað þetta varðar en þó er það honum engin afsökun.

Komið hefur fram í fréttum að tap sparisjóðsins hafi verið 10,6 milljarða króna á fyrstu 6 mánuðum ársins sem er geigvænlægt og hlýtur að krefjast nánari skýringa. Athygli vekur að með skýringum við árshluta uppgjör kemur einnig fram að lán Sparisjóðs Keflavíkur til stjórnarmanna og fyrirtækja þeim tengdum hefur farið úr 194 milljónum króna um síðustu árámót í 1,6 milljarða króna sex mánuðum síðar.

Nú er það svo að sparisjóðunum er ekki ætlað að vera í áhættusæknum rekstri , kaupum og sölu verðbréfa í áhættusjóðum eða almennum fasteignaviðskiptum. Þeir eru fyrst og fremst viðskiptasjóðir. Það væri því fróðlegt að vita hvernig þetta tap er saman sett og hve stór hluti af þessum 10,6 milljörðum hefur tapast sérstaklega vegna viðskipta á Vestfjörðum.

Varla dugar þessi stórmannalega aðgerð Sparisjóðsins að segja upp fjórum manneskjum á Vestfjörðum og loka afgreiðslunni á Borðeyri til þess að vega á móti þessu 10,6 milljarða tapi.

Á sama tíma skilar Sparisjóður Suður- Þingeyinga hagnaði en hann er einn fárra sem starfar eftir grunngildum sparisjóðanna. Vestfirðingar hljóta að spyrja um t.d. hvað stjórnendur Sparisjóðs Keflavíkur hafi í laun og hvort þeir hafi lækkað sitt eigið kaup í takt við niðursveifluna. Jafnframt hljóta þeir að spyrja hvort hlutfallslega hafi verið sagt upp sama fjölda starfsfólks í höfuðstöðvunum eða á suðvesturhorninu.

Með nútíma tækni er hægt að vinna mörg störf einmitt tengt fjármálastarfsemi óháð staðsetningu. Það væri þess vegna hægt að færa störf frá höfuðstöðvum sjóðsins til Vestfjarða. Þar ræður vilji stjórnenda fyrst og fremst ferð.

Nú hefur hópur fyrrum eigenda SPRON kært stjórnendur þess sparisjóðs vegna meints fjármálamisferlis með eigur sjóðsins. Íbúar í Borgarbyggð krefjast þess að fá upplýsingar um hvernig það mátti gerast að Sparisjóður Mýrasýslu tapaði þar milljörðum króna á örfáum mánuðum og hverjir báru þar ábyrgð. Það er nú oft svo að þegar einn tapar þá hagnast annar.

Sparisjóðirnir eru að fara með almannafé, samfélagseignir og þó brask eigi aldrei að viðgangast þá gilda þrátt fyrir allt aðrar siðferðiskröfur um sparisjóði heldur en hlutafélagsbanka, sem hefur það eitt að markmiði að hámarka arð hluthafa sinna.