Sendum Samtök atvinnulífsins til Bandaríkjanna!

 Öllum hlýtur að blöskra veruleikafirring Samtaka atvinnulífisins. Nú krefjast þau að Íbúðalánasjóður verði þegar í stað einkavæddur og afhentur bönkunum. Ég held að væri rétt  að senda forystumenn þeirra  úr landi á flugmiða aðra leiðina til Bandaríkjanna. Og leyfa þeim ekki að snúa  til baka fyrr en og ef þeir hafa tekið sönsum.  Í Bandaríkjunum var jú verið að þjóðnýta  íbúðalánasjóðina þar í landi.

Einkavæðing íbúðalánasjóðanna í Bandaríkjunum og græðgi þeirra sem komust yfir þá á sínum tíma á stóran þátt í lausafjárkreppu og ringulreið á fjármálamörkuðum heimsins, þar á meðal hér á landi.

Vilja Samtök atvinnulífisins virkilega að við lendum í sama feninu og Bandaríkjamenn með einkavæðingu  Íbúðalánasjóðs?

Sú staðreynd að Íbúðalánasjóður okkar er í opinberri eigu veitir almenningi og fjármálalífinu á Íslandi grunnöryggi  á erfiðleika tímum sem margur mun nú öfunda okkur af. 

Málflutningur þeirra er til skammar

Tillöguflutningur Samtaka atvinnulífsins er mikið áhyggjuefni  fyrir íslenskt samfélag. Málflutningur þeirra er  með ólíkindum  og hrokafullur og nú tekur steinnin úr hvað  Íbúðalánasjóð varðar.

Það er Samtökum atvinnulífsins  til skammar að berja áfram slíkar kröfur í því efnahagsástandi sem við nú búum við.

.