Sjávarsafnið í Ólafsvík

Oft fyllist maður aðdáun á djörfung, dug og fórnfýsi fólks og hverju fá má áorkað ef sterkur vilji er til staðar.  Fiskasafnið á Norðurtanganum í Ólafsvík er gott dæmi um slíkt framtak  einstaklinga.Þar hafa þau Jenný Guðmundsdóttir og Jóhannes Ólafsson komið upp safni og sýningu á fjölbreyttu lífi sjávarfiska og öðrum sjávardýrum. Safnið stendur opið ferðafólki og heimamönnum án aðgangseyris alla daga sumarsins.

 Sjósókn og fiskvinnsla er afar snar  þáttur í daglegu lífi og starfi heimafólks í Snæfellsbæ. Nýtur safnið  ríkulegs velvilja sjómanna og útgerðamanna á svæðinu með útvegun sjávardýra til  sýningar lengri og skemmri tíma. Safnið er eitt fárra sinna tegundar hér á landi og það eina við Breiðafjörð. 

Í spjalli mínu við þau Jenný og Jóhannes í gær kom fram að hugur þeirra stendur til að  efna til enn ítarlegra safns og sýningar á fjölbreyttu lífríki Breiðafjarðar og tengja  það námi  og kennslu bæði við  grunnskólana og einnig við hinn nýja  og örtvaxandi Fjölbrautarskóla Snæfellinga í Grundarfirði.

Þá á safnið  mjög náið samstarf við Sjávarrannsóknasetrið í Ólafsvík og ljóst að í samstarfi þessara tveggja aðila búa mörg  tækifæri og  vaxtarmöguleikar í rannsóknum og fræðslu.  Starfsemi þeirra í heild  getur síðan nýst öðrum rannsóknastofnunum,  skólum, almenningi, ferðamönnum og ekki síst  þeim mörgu  sem eiga afkomu sína og atvinnu undir gjöfulu lífríki Breiðafjarðar.

 Ég hvet þá sem eiga leið um Snæfellsnes  að líta við á þessu  merka sjávarsafni  í Ólafsvík.  Þar er margt forvitnilegt að sjá.