Skáldastund í Dölum !

Í gær, laugardag,  var afhjúpaður minnisvarði og söguskilti að Tjarnarlundi í Saurbæ um þrjú höfuðskáld þjóðarinnar: Sturlu Þórðarson(1214-1284), Stefán frá Hvítadal( 1887- 1933) og Stein Steinarr( 1908- 1958). 

 Athöfnin var einkar hátíðleg þar sem Árni Björnsson þjóðháttafræðingur og Dalamaður flutti  hnyttið ágrip af skáldalífi þeirra félaga. Síðan fylgdi söngur og upplestur í vandaðri dagskrá sem lauk með hlöðnu kaffiborði að hætti Dalamanna.

 Minnisvarðann hannaði Jón Sigurpálsson, forstöðumaður Byggðasafns Vestfjarða á Ísafirði. Eru það þrír steinstólpar með grænum glerplötum og er hverjum þeim ætlað að lýsa í nokkru inn í hugarheim og lífshlaup skáldanna. Sjón eru sögu ríkari í þeim efnum og hvet ég fólk til að leggja leið sína að Tjarnarlundi að þessu fagra listaverki. Það er Sögufélag Dalamanna sem stendur  að verkinu að frumkvæði Sigurðar Þórólfssonar bónda í Innri- Fagradal ásamt fjölskyldu hans.

Sturla var fæddur Dalamaður  og bjó lengst af á Staðarhóli, en Hvamms- Sturla var afi hans .  Steinn ( Aðalsteinn Kristmundsson) var fæddur að Laugalandi við Ísafjarðardjúp en fór á öðru ári með móður sinni suður í Saurbæ og ólst þar upp. Stefán Sigurðsson frá Hvítadal var fæddur á Hólmavík en fór 14 ára gamall með fósturforeldrum sínum að Hvítadal og kenndi sig síðan við þann bæ.

Skrif og skáldskapur þessara snillinga  eru ein af höfuðdjásnum þjóðarinnar á sviði bókmennta, lista og sagnaritunar.

Sem dæmi um áhrifamátt skáldsins má nefna að nokkru áður en Stefán gaf út ljóðabók sína  „Söngva förumannsins“  með ljóðinu ástsæla  „Erla góða Erla“ bar engin  kona það nafn í þjóðskrá Íslendinga. Örfáum árum seinna skiptu „Erlurnar“ hundruðum og voru flestar um tvöþúsund.  

Fer vel á að eiginkona Sigurðar  í Fagradal,  sem ásamt honum hvatti til þessa minnisvarða ber nafnið Erla.

Þökk Dalamenn fyrir hugljúfa, fallega og í senn virðulega stund og lofsvert framtak.