Efnahagsbrotadeild á fundi hjá viðskiptanefnd um yfirtökur á sparisjóðum.

Viðskiptanefnd Alþingis fundaði í dag um stöðu Sparisjóðanna og þá „ árás“  sem hópur fjáraflamanna   hefur  gert á sjóðina á síðustu misserum.  Athyglisvert er að nöfn sömu manna  og  fyritækja koma upp í yfirtökum  hvort heldur það er varðandi  SPRON,  Sparisjóð  Mýrasýslu eða  Sparisjóð Skagafjarðar.

Svo virðist sem Fjármálaeftirlitið ráði ekki við mál af þessum toga.  Fram kom að það hefði tekið það  heila sjö mánuði  að svara kæru frá heimamönnum í Skagafirði  um lögmæti yfirtöku Sparisjóðs Mýrasýslu og hóp utanhéraðsmanna  tengdum  S-hópnum  á Sparisjóði Skagafjarðar.Þegar svo úrskurðurinn  loks kom var í engu svarað þeim fyrirspurnum sem beint var til eftirlitsins  og það vísaði á dómstóla.

Þá virðast krosseigna-  og stjórnunartengsl  bæði við þrot Sparisjóðs Mýrasýslu og SPRON   vægast sagt sérstæð.

Ég tel að Fjármálaeftirlitið ætti að hafa sömu stöðu og Umboðsmaður Alþingis þannig að sjálfstæði þess væri tryggt.  

Hinn almenni stofnfjárhafi  virðist hafa  litla möguleika til að verja rétt sinn og samfélagsins gegn „peningahákunum“  sem hafa valsað um og sölsað undir sig almenningseignir á undanförnum árum.  Nú nýta þeir erfiða stöðu á fjármálamarkaði til fulls að ná undir sig eignum á lágmarksverðum.    

Brýnt er að verja sparisjóðina með lögum og að  einungis þeir sem starfa  á grundvelli sparisjóðahugsjónarinnar  megi bera  „sparisjóð“ í heiti sínu.