„Heim að Hólum“ - Hólahátíð

Hin árlega „Hólahátíð“  fór fram um síðustu helgi við mikinn hátíðleik að viðstöddu fjölmenni í blíðskaparveðri.

Hápunktur hátíðarinnar var vígsla á nýrri, forkunnarfagri kantarakápu sem er nákvæm eftirgerð  af einni kápu Jóns Arasonar biskups.

Kápan er  gjöf vígslubiskupshjónanna, herra Jóns Aðalsteins Baldvinssonar og Margrétar Sigtryggsdóttur til Hóladómkirkju. 

 Vel fer á að þessi höfðinglega gjöf er til  minningar um hugljúfa  dóttur þeirra biskupshjóna,  Sigrúnu, skólastjóra Tónlistaskólans í Stykkishólmi.  Fráfall Sigrúnar var þeim sem þekktu til mannkosta hennar mikil harmafregn. Hún  lést 5.sept. 2004 úr krabbameini  aðeins 36 ára gömul.

Með þessari fögru kórkápu bætist Dómkirkjunni á Hólum  enn einn dýrgripur sem mun fylgja henni og prýða um aldir.

Í aðdraganda 400 ára dánardags Jóns biskups Arasonar og sona hans 1950  efndu Norðlendingar til kirkjuhátíðar á Hólum.  Baráttumálin voru að reisa Jóni Arasyni og sonum hans minnismerki á Hólum af því tilefni. Í einstæðu níðingsverki  Íslandssögunnar voru  þeir feðgar  hálshöggnir í Skálholti 7. nóv. 1550 eins og alþjóð veit. 

Klukkuturninn við  Hóladómkirkju, minnismerki þeirra feðga, er nú sterkt einkennistákn Hólastaðar. Fer vel  á að  Hólastaður sé þannig helgaður sjálfstæðishetjunni, trúmanninum og skáldinu Jóni Arasyni Hólabiskupi.

Síðan þá hefur „Hólahátið“ verið árlegur viðburður í kirkju- og öðru  menningarlífi Norðlendinga.