Sparisjóður Mýrasýslu settur á útsölu til valinna?

  Fákeppni og einokun á fjármálamarkaði eykst. Eru örfáir auðmenn að nýta sér umræðuna á fjármálamarkaði til að eignast alla banka og sparisjóði landsins?.

Ljóst hefur verið í nokkurn tíma að fámennur hópur fjármálamanna var að bora sér leið bakdyramegin inn í Sparisjóð Mýrasýslu til að komast yfir eigur hans fyrir lítið. Nýjustu fregnir herma að Kaupþing sé að eignast 70% hlut í Sparisjóði Mýrasýslu,  einum stærsta  sparisjóði landsbyggðarinnar á aðeins 1750 milljónir  króna. Er ekki eitthvað athugavert með stjórnendur eins sterksta sparisjóðs lanndsins að koma honum í þessa stöðu og gera hann svo "verðlítinn"  á skömmum tíma? 

Verði af þessari eignaupptöku á Sparisjóði Mýrasýslu munu eigendur Kaupþings  einnig komast yfir  meirihluta í  Sparisjóði Skagafjarðar sem Sparisjóður Mýrasýslu sölsaði undir sig nýverið  og sameinaði Sparisjóði Siglufjarðar með aðstoð stjórnenda hjá Kaupfélagi Skagfirðinga og fleiri aðila sem tengdust gamla Sambandshópnum.  Í meðgjöf fylgir svo Sparisjóður Ólafsfjarðar.

 Svo virðist sem þessi atburðarás sé löngu hönnuð af þeim fámennishóp sem nú eru að leggja undir sig fjármálastofnanir landsmanna.  Leiðir þessara aðila liggja saman m.a. í  Kaupþingi  gegnum Exista  sem margir sparisjóðsstjórnendur bundu fé  sjóðanna  í.  

Fjármálaeftirlitið verði lagt undir Kaupþing!

Athyglisvert er að Fjármálaeftirlitið  virðist almennt leggja blessun sína yfir þessar  yfirtökur og framferði umræddra aðila á fjármálamarkaðnum sem mörgum finnst vera drifið áfram af hreinni græðgi og jafnvel beinni  lögleysu. Væri ef til vill  bæði hagræði og sparnaður að leggja Fjármáleftirlitið  beint inn í  einhvern bankann svo boðleiðir yrðu sem stystar?

 Almenningi í landinu, alla vega bændum í Skagafirði er ljóst að Fjármálaeftirlitið er ekki þeirra bandamaður í stríðinu við peningaöflin.

Hart var tekist á um Sparisjóð Skagafjarðar fyrir um ári síðan, en almennir stofnfjárhafar í Skagafirði vildu halda í Sparisjóðinn sinn. En þeir  fengu ekki reist rönd við klækjum þeirra sem vildu komast yfir  sjóðinn.  Sparisjóður Skagafjarðar þó lítill væri, þjónaði vel sínu byggðarlagi að því marki sem hann hafði afl til. Bændur í Skagafirði höfðu fyrir nokkrum misserum sótt og varið Sparisjóð sinn fyrir Hæstarétti  gegn sömu aðilum.  

Það er dapurt að sjá hvernig örfáir auðmenn eru nú að sölsa átölulaust undir sig flestar fjármálstofnanir landsins. Fákeppnin var mikil fyrir en er nú að nálgast nær einokun.  Milli uppgjör bankanna sýnir að einnig í efnahagserfiðleikum og þrengingum fólks raka þeir að sér gróða en hrópa samt á fjárstuðning frá ríkissjóði.

Græðgina verður að stöðva!

Ríkisstjórn Sjálfstæðisflokks og Framsóknarflokks einkavæddi bankana og afhenti þá pólitískum vildarvinum sínum. Þar með var þeirri  græðgisvæðingu fjármálageirans hleypt af stað sem dregur nú þungan dilk á eftir sér fyrir allt samfélagið.

Er ekki kominn tími til að setja upp rauða spjaldið, stöðva græðgisöflin og sjálftökuliðið af ,  setja bankakerfið í eina allsherjar rannsókn?

 Byrja svo  upp á nýtt með fjármálaþjónustu landsins á heilbrigðum grunni.