Bryggjuhátíð á Drangsnesi

 Hin árlega Bryggjuhátíð á Drangsnesi fór fram um helgina í miklu blíðskaparveðri.

Gestir skiptu þúsundum og nutu þeir þess sem heimamenn höfðu þar fram að bjóða í fjölbreyttri dagskrá.

Ferðir í Grímsey, myndasýningar, fótbolti, söngvakeppni, kvöldvaka, varðeldur, dans  og margt fleira.

Mörgum fannst þó hápunkturinn vera þar sem  sjávarréttaborðin svignuðu undan kræsingum, lostæti sem ekki er nú daglega á borðum, en  gestirnir snæddu af hjartans lyst.

Brottfluttir Strandamenn og heimamenn endurnýjuðu kynni og rifjuðu upp minningar liðinna ára.

Drangsnes er samhent  samfélag sem býr vel að sínu, útgerð og  fiskvinnslu sem þó berst við afleiðingar af misheppnaðri fiskveiðistjórn og  ranglátt kvótakerfi . En þeir eiga  heitt vatn, nýja sundlaug og  hér er vaxandi uppbygging í ferðaþjónustu.

Það er svo sannarlega ástæða til að hvetja sem flesta til að sækja Drangsnesinga heim.  

Við hjónin höfum sótt Bryggjuhátíðina  í allmörg undanfarin ár og njótum þar einnar af mörgum góðum stundum sumarsins í hópi góðra  vina og stórs frændgarðs.