„Sjálfstæðið er sívirk auðlind“

Margur spyr sig nú hverra erinda "ESB-trúboðarnir" ganga hér á landi ef ekki má ræða kosti og galla þeirra samninga sem við höfum gert við Evrópusambandið  á undanförnum árum og endurmeta stöðu þeirra ef þörf er á.

Jafnframt verði opinskátt og fordómalaust  metnir  möguleikar á auknu samstarfi við ESB , sem og önnur ríki,  út frá reynslunni,  sjálfstæði þjóðarinnar og hagsmunum íslensks almennings bæði til skemmri og lengri tíma.

 Í nýlegri skoðanakönnun Gallup kom fram að um 90% þjóðarinnar vill óbreyttan Íbúðalánasjóð sem þjóni öllum íbúum landsins jafnt.

"ESB- trúboðarnir" vilja hins vegar Íbúðalánasjóð feigan.

„Kratarnir“ í ríkisstjórnarflokkunum vilja opna fyrir óheftan innflutning á hráu kjöti og fórna þar með fjölþættum hagsmunum neytenda, íslensks landbúnaðar, þúsundum starfa í innlendri matvælavinnslu og fæðuöryggi þjóðarinnar. Þeir fullyrða að Evrópusambandið krefjist þess.

Skoðanakönnun á vegum Gallup sýnir hinsvegar að fólkið í landinu er allt annarrar skoðunar:  - um 95% þjóðarinnar vill öflugan íslenskan landbúnað og innlenda matvælavinnslu.

Svo sjálfsagt sem það er að gera gagnkvæma viðskiptasamninga við önnur ríki  og ríkjasambönd er mikilvægt að hafa ávallt í huga heiti ágætrar bókar Ragnars Arnalds, Sjálfstæðið er sívirk auðlind.  Það veit enginn hvað átt hefur fyrr en misst hefur í þeim efnum.