Álbræðslur- bankar - evra - Vilhjálmur Egilsson

Yfirlýsingar  framkvæmdastjóra  Samtaka atvinnulífsins um fleiri álbræðslur, um evru, um að leggja niður Íbúðalánasjóð  þurfa ekki að koma á óvart. Bankarnir og álbræðslurnar eru með stærri fyrirtækjum sem  fjármagna Samtökin.

Stóru viðskiptabankarnir kærðu Íbúðalánasjóð til  ESA- dómstólsins. Þeir  hafa aldrei farið dult með að vilja Íbúðalánasjóð feigan. Það hefur Sjálfstæðisflokkurinn og frjálshyggjuliðið í Samfylkingunni  líka viljað.  Það eru því engin ný tíðindi að framkvæmdastjóri Samtaka  atvinnulífsins geri það sem yfirboðarar hans krefjast:  níða niður Íbúðlánasjóð. Þótt þjóðin sé hinsvegar þeirrar skoðunar að talsmenn fjármálafyrirtækja  ættu frekar  að skammast sín og draga kæruna á Íbúðalánasjóð til baka og biðjast afsökunar.

Framkvæmdastjóri Samtaka atvinnulífisins heimtar fleiri álbræðslur, fleiri stórvirkjanir. Að sjálfsögðu enda fjármagna núverandi álbræðslur, beint og óbeint, að stórum hluta Samtökin sem hann vinnur fyrir.

Stóru viðskiptabankarnir heimta evru, heimta fleiri álbræðslur, fleiri stórvirkjanir meiri einkavæðingu.

Fjármálastofnanir hafa einmitt  verið gerendur í græðgisvæðingunni og  drifið áfram   „ morfín“ -hagkerfi ríkisstjórnar Sjálfstæðisflokksins .

Álbræðslurnar eru meðal  stærstu viðskiptavina bankanna . Fjármálageirinn virðist hafa  lofað lánadrottnum sínum erlendis að hér yrðu byggð fleiri álver. Báðir þessir aðilar vilja inngöngu í Evrópusambandið og heimta upptöku evru.

Þegar framkvæmdastjóri Samtaka atvinnulífisins reynir að gráta út óbreytt kjaramisrétti, óbreytta einhæfni atvinnulífs, óbreytt ofurlaun stjórnenda og sjálftökuliðs og heimtar  fleiri álbræðslur er hann aðeins að fara að skipunum yfirboðara sinna.

Samtök í sjávarútvegi og fiskvinnslu hafa þó lýst andstöðu við málflutning framkvæmdastjórans  og  mörg fyrirtæki og samtök hafa ekki ályktað um mörg þau atriði sem Vilhjálmur Egilsson tjáir sig svo fjálglega um.

Hafa sumir á orði að framkvæmdastjórinn gangi ansi langt í yfirlýsingum sínum til að þjóna bönkunum og álbræðslunum  og draga í efa umboð hans í þeim efnum.