Blekkingar á Bakka við Húsavík

Allir kunna söguna af Bakkabræðrum sem byggðu sér nýtt hús en án glugga. Birtuna í húsinu ætluðu þeir svo að leysa með því að bera sólina inn í trogum.

Líkt virðist komið á með álversáformin á Bakka við Húsavík. Þar á að byggja álbræðslu en orkan og skynsemin finnst ekki.

Þegar er búið að verja um 5  milljörðum króna í leitina. Nefnt er að boranirnar muni kosta  yfir  10 milljarða áður en yfir lýkur en möguleikar  virðast fara dvínandi á að næg virkjanleg orka  fyrir „gluggalausa“  álverið finnist.Íbúar Húsavíkur og nágrennis, reyndar landsmenn allir, ættu að velta fyrir sér hvað annað væri hægt að gera á svæðinu  fyrir 8-10 milljarða til eflingar atvinnulífs til framtíðar. Og þó ekki væri nema helmingur þeirrar upphæðar í stað „gluggalausa“ hússins.

Hvað annað væri hægt að gera fyrir 10 milljarða?

Sveitarstjórnir og atvinnumálanefndir í Þingeyjarsýslu ættu að láta fara fram skoðanakönnun á því hvað fólk vildi gera annað fyrir 10 milljarðana  og eiga dýrustu náttúruperlur sínar ósnortnar til framtíðar.  Og þó ekki væri nema helmingur eða einungis þriðjungur af þeirri  upphæð.

 Bjarnarflag, Krafla, Þeistareykir og Gjástykki eru  dýrmæt náttúrufyrirbæri á heimsmælikvarða.  Erum við virkilega svo hugmyndasnauð þjóð að koma ekkert annað til hugar en að fórna náttúruperlum okkar í erlenda stóriðju?

Nú þegar eru meira en 80% af raforku landsmanna bundin í áli.  Hvað gera Danir, Írar og Hollendingar sem engin eiga álverin?

Orkan sem þarf finnst ekki?

Fyrirsagnir blaða í tilefni af undirskrift Össurar um áframhald álbræðslu við Bakka  benda til þess að menn hafi orðið fyrir miklum vonbrigðum með árangur borana.Og þegar lesið er í gengum yfirlýsingarnar er ljóst að miklir varnaglar eru slegnir.

Önnur blekking er stærð álbræðslunnar. Talað er um 250 þúsund tonna álver. Eigendur Alcoa hafa ætið sagt að svo lítið álver borgi sig varla og þeir vilji a.m.k 400 þúsund tonna álver. Bent Reitan, aðstoðarforstjóri Alcoa, hélt því rækilega til haga í fréttflutningi í gær við undirskriftina með Össuri.  Björn Jóhann Björnssson gerir óvissunni með orkuna fyrir álverið ágæt skil í Morgunblaðinu 26.06. sl. 

Skjálfandafljót og Jökulsárnar í Skagafirði að veði!

Þegar skrifað var undir yfirlýsinguna um álbræðsluna á sínum tíma mátti greina efasemdatón hjá forstjóra Alcoa gagnvart því að  treysta á orku fra jarðhita einum saman. Mun meira öryggi væri í orku frá   vatnasaflsvirkjunum. Mátti öllum vera ljóst hvert hugurinn stefndi með 400 þús. tonna álver á Húsavík, knúið orku að hluta frá Skjálfandafljóti og að hluta frá Jökulsám Skagafjarðar Í aðdraganda staðarvalsins fyrir álver á Norðurlandi var einmitt lagt að öðrum  sveitarstjórnum í fjórðungnum  að skrifa undir yfirlýsingu þess efnis að þær væru reiðubúnar að leggja orkulindir héraða sinna til álversins, óháð því  hvar  það væri reist. 

Friðlýsum jökulárnar

Sveitarstjórnarhópur VG í Skagafirði hefur ítrekað lagt fram tillögur um friðlýsingu Jökulsánna fyrir virkjunum  og  þingflokkur VG hefur endurtekið lagt fram tillögu á Alþingi um sama efni.Samkvæmt  yfirlýsingum Samfylkingarinnar fyrir kosningar um „Fagra Íslandi“ átti það að verða eitt fyrsta verk flokksins, kæmist hann í ríksstjórn, að friðlýsa Jökulsárnar í Skagafirði. Hinsvegar „gleymdist“ það  í stjórnarsáttmálanum eins og fleira hjá þeim flokki. Sjálfstæðisflokkurinn fær frítt spil.Allt bendir því til að bæði Skjálfandafljót með Goðafossi og Jökulsárnar í Skagafirði séu lagðar að veði fyrir „gluggalausu“ álbræðsluna á Bakka.

Gerum betur en Bakkabræður

Þegar það verður endanlega opinbert að orka til álbræðslunnar  á Bakka í þeirri stærð sem hinn erlendi auðhringur krefst fæst ekki með borunum verður íbúum Norðurlands og landsmönnum öllum stillt upp við vegg og  orkunnar krafist úr  höfuðdjásnum fallvatna  Þingeyinga og Skagfirðinga.

Álæðið hefur alltaf verið keyrt áfram á blekkingum.

Er ekki kominn tími til að læra af reynslunni og gera betur en Bakkabræður?

Greinin birtist í Morgunblaðinu 29.júní og skagafjordur.com.