Hvar er Sól í Straumi?

 Það vakti aðdáun og sterkar  framtíðarvonir þegar  Hafnfirðingar höfnuðu stækkun álversins í Straumsvík í íbúakosningu fyrir rúmu ári síðan. „Sól í Straumi“ – samtök umhverfis- og náttúruverndarsinna og þeirra sem töldu nóg komið af álverum fögnuðu sigri.

Í þeim hörðu átökum sem fóru fram um álverið,  lá ljóst fyrir að virkja þurfti enn frekar í Þjórsá til að sjá aukinni álframleiðslu í Straumsvík fyrir raforku.

Slagurinn gegn  stækkun álversins í Straumsvík  var  því nátengdur baráttunni fyrir verndun Þjórsár.

Samtökin Sól á Suðurlandi studdu dyggilega baráttu félaga sinna í Hafnarfirði og jafnvel er fullyrt að framlag þeirra á lokametrum átakanna hafi ráðið úrslitum um að stækkun álversins var felld.En áfram sækja álrisarnir og  Landsvirkjun að náttúruperlum Þjósár.

Í fréttum nýverið fagnaði forstjóri Landsvirkjunar  áfanga sigri  í herförinni  að Þjórsá og lýsti  því yfir að raforka úr næstu virkjunum í ánni  ætti m.a. að fara til aukningar á framleiðslu álversins í Straumsvík.

Íbúar við Þjórsá, Sól á Suðurlandi og náttúruverndarsinnar um allt land munu áfram verja  perlur Þjórsár, standa gegn virkjunaráformunum og berjast til  sigurs  þótt það kosti „blóð svita og tár“.

 Nú þegar stjórnvöld sækja enn á ný og af auknum þunga í orku frá  náttúruperlum Þjórsár til álframleiðslu í Hafnarfirði er eðlilegt að spurt sé : hvar er Sól í Straumi og stuðningur annarra þeirra Hafnfirðinga sem börðust svo hetjulega gegn stækkun álversins í Straumsvík fyrir aðeins nokkrum misserum. 

Þess er fastlega vænst  að félagar „Sólar í Straumi“ láti til sín taka í baráttunni fyrir verndun Þjórsár og geti svo  farið á tónleika Bjarkar og Sigurrósar  á morgun, laugardag  og eflt enn frekar baráttuandann með öðru sönnu náttúruverndarfólki.

Það er vont að ganga stöðugt með „ hnút í maganum“ eins og sumir þykjast gera, sem svíkja nú dýrustu kosningaloforð sín og náttúruperlur Þjórsár  til að geta vermt  ráðherrastólana með Sjálfstæðisflokknum.

Þess vegna er enn brýnna en fyrr að náttúruverndarsinnar og aðrir  þeir sem telja nóg komið af álverum og mengandi stóriðju þétti raðir sínar.

Gleðilega baráttu hátíð með Björk og Sigurrós!