Samfylkingarráðherrar á álversskóflunni!

 „Fagra Ísland. Stóriðjustopp !“ var eitt aðal kosningaslagorð Samfylkingarinnar fyrir einu ári síðan. Með því átti að: „…. Slá ákvörðunum um frekari stóriðjuframkvæmdir á frest þangað til fyrir liggur nauðsynleg heildarsýn yfir verðmæt náttúrusvæði Íslands og verndun þeirra hefur verið tryggð…“. Þannig aflaði Samfylkingin sér atkvæða meðal  þeirra er höfðu sjónarmið  umhverfisverndar að leiðarljósi og út á stuðning  þess fólks situr nú sama  stóriðju- og náttúruspjalla ríkisstjórn Sjálfstæðisflokksins. Þrátt fyrir hástemmd loforð Samfylkingarinnar í þessum málum hefur hún áorkað lítið annað en taka sér sæti Framsóknar við hlið Sjálfstæðisflokksins og áfram er keyrt á stóriðjupólitík með tilheyrandi umhverfisspjöllum.   

 

Björgvin á álversskóflunni

Það var athyglisvert að sjá Björgvin G. Sigurðsson ráðherra Samfylkingarinnar taka fyrstu  skóflustungu  að nýju álveri í Helguvík  sl. föstudag. Samtímis boðaði  - „Græna netið, félag jafnaðarmanna um umhverfið, náttúruna og framtíðina-“  til skoðunarferðar um háhitasvæðin á  Hellisheiði, Hverahlíð og Ölkelduhálsi. Þessi svæði  eiga ásamt nýjum  virkjunum í Þjórsá að sjá álverinu fyrir orku. 

  Samfylkingin virkjar í Þjórsá!

Meðan íbúar við Þjórsá leggja nótt við dag til að verjast yfirgangi stjórnvalda og lögleysu Landsvirkjunar  stendur ráðherrann gleiðfættur og  gleiðbrosandi á álverskóflunni við Helguvík. Kannski minnast einhverjir „grænir“  kjósendur Samfylkingarinnar hástemmdra yfirlýsinga Björgvins  og fleiri núverandi  ráðherra  þess flokks um stöðvun virkjanaáforma í Þjórsá og verndun háhitasvæðanna á Reykjanesi.  

 Þingmaður Vinstri grænna

Ólíkt þessum undirlægjuhætti  stendur  Atli Gíslason lögmaður og þingmaður Vinstri grænna í Suðurkjördæmi í baráttu með  þeim sem berjast  fyrir  verndun  Þjórsár gegn frekari virkjunarspjöllum. Atli  aðstoðar nú  landeigendur sem vilja verja náttúruperlur sínar með lögum gegn óbilgjarni ásælni virkjanaóðra ráðherra Samfylkingarinnar

Björk og Sigurrós

„Mér finnst komið nóg af álverum“ , sagði Björk Guðmundsdóttir í sjónvarpsviðtali á dögunum.„Íslensk náttúra er einstök og landsmönnum ber skylda til að vernda hana. Hún er paradís, frumkraftur, hrein og ekta. Það er hættulegt, beinlínis neyðarástand ef við ætlum að eyðileggja þetta“Það er fagnaðarefni að Björk og  hljómsveitin Sigurrós skuli beita sér fyrir stórtónleikum 28. júní næst komandi  til verndar og heiðurs hreinni,  íslenskri náttúru. Ekki mun af veita gegn virkjana- og  stóriðjuæði valdhafanna.  

 

 „ Farísear“ Samfylkingarinnar

 Hinsvegar kæmi mér ekki á óvart þótt hin ýmsu Björgvinjar og ein og ein  Þórunn  Samfylkingarinnar  muni berja sér á brjóst að hætti Farísea, leika náttúrverndarsinna og  hópast á tónleika Bjarkar og Sigurrósar, sem haldnir verða  gegn álæðinu en  til verndar og heiðurs hreinni íslenskri náttúru.

Hræsnin og tvískinnungurinn  virðast engin takmörk sett á þeim bæ hvað  náttúruvernd og stóriðju varðar.