Ónýt ríkisstjórn - Allt danskinum að kenna!!

Ég var að horfa á þá Steingrím Joð og Pétur Blöndal í Kastljósinu.

Steingrímur var rökfastur að vanda en  lágt var risið á talsmanni Sjálfstæðisflokksins. Sá flokkur hefur jú stýrt efnahagsmálum í rúman hálfan annan áratug. Steingrímur benti réttilega á að efnahags vandinn  og óreiðan væru fyrst og fremst heimatilbúin. Á sinum tíma var talað um „ógnarjafnvægi“ í efnahagsmálum þegar stóriðjuframkvæmdir fóru á fullt samtímis og skattar voru  lækkaðir á hátekjufólki og bankarnir fengu frítt spil. Það myndi bresta fyrr eða síðar

  Persónur og leikendur dagsins !

„ Bubbi kóngur“ tók sviðið  í fjölmiðlum sem oft áður og setti  nýtt  Íslandsmet í vaxtahækkunum. Og brátt sláum við heimsmet í vaxtaokri. Bankastjórar gleðjast -auðvitað, hvað ekki?  „ Bubbi“  bauðst til að gera enn betur  ef víman og dofinn  rynnu ekki af ríkisstjórninni.  Svo allt væri nú á sínum stað hnýtti hann um leið í bankana ( les Kaupþing) fyrir að gera atlögu að krónunni sér til ávinnings.  

Dapurt hlutskipti Geirs Haarde er sjálfskapað en ekki öfundsvert.  

En á leiksviði dagsins var hver á sinni fjöl.  Sami kóngur -, sama hirð og undanfarin 17 ár.  

Og fjölmiðlar fóru í korktappaleik á gáruðum vatnsfletinum í spurningum sínum um efnahagsmálin. Það er svo gott að hrærast bara í núinu.

 En blessuð þjóðin, almenningur, borgar brúsann fyrir dugleysi  ríkisstjórnar sem enginn kaus.