Söngur í áttatíu ár

Ætti ég hörpu hljómaþýða,

hreina mjúka gígjustrengi,

til þín mundu lög mín líða,

leita þín , er einn ég gengi.

(Lag. Pétur Sigurðsson, ljóð Friðrik Hansen, 1917)

„En þó er nú sök til, því að þvílíka rödd heyrði ég aldrei fyrr af nokkurs manns barka út ganga, og er þetta heldur engilleg rödd en mannleg“. Þetta sagði erkibiskupinn í Lundi sér til afsökunar árið 1106 er hann og aðrir kórbræður litu um öxl í kirkjunni þá er Jón Ögmundsson Hólabiskup hóf upp söngraust sína í kirkjudyrum. Ein slík  stund var í Íþróttahúsinu í Varmahlíð sl. laugardagskvöld þegar Karlakórinn Heimir hélt sína árlegu Þrettándagleði. Hún var nú tileinkuð stórtenórnum og Skagfirðingnum  Stefáni Íslandi á 100 ára ártíð hans.

Hátt á sjötta hundrað  manns voru þar samankomin til að hlýða á Karlakórinn skemmta velunnurum  sínum.  Bræðurnir frá Álftagerði, Pétur, Sigfús  og  Óskar Péturssynir  ásamt tenórnum Þorgeiri Andréssyni yljuðu gestum með frábærum einsöng.  Hápunktur í  fjölbreyttri söngskrá voru einkennislög Stefáns, svo sem   „Áfram veginn“  í flutningi sýslunga hans  Sigfúsar Péturssons og  „O sole mio“ í flutningi einsöngvara, kórs og hljóðfæraleikara. Samantekt Gunnars Rögnvaldssonar á texta með æviferli Stefáns var einkar nærfærin og lifandi og lestur  þeirra Agnars í Miklabæ og Hannesar Blandons féll vel að heildar flutningum.

„ Lífið allt má léttar falla“

Í ávarpi formannsins, Jón Sigurðssonar á Reynistað  er komist svo að orði: „ Þessa átta áratugi hefur kórinn verið einn af hornsteinum skagfirskrar menningar og oft til hans leitað  við hátíðleg tækifæri. Kórinn hefur átt því láni að fagna að njóta vinsælda um allt land á tónleikaferðum sínum undanfarna áratugi.  Það er ekki sjálfgefið að kórar starfi af svo miklum krafti sem Heimir hefur gert í heil áttatíu ár. En þegar saman fer sönghefð Skagfirðinga og ómældur stuðningur eiginkvenna söngmanna, þá eru áttatíu ár vonandi aðeins hluti af söngferli Heimis.“

Kórinn hefur alla tíð átt á að skipa frábærum leiðtogum. Fyrsti söngstjóri  kórsins var  félagsmálafrömuðurinn Gísli Magnússon í Eyhildarholti en eftir hann kom Pétur Sigurðsson tónskáld sem gaf kórnum nafnið Heimir. Pétur hafði áður stofnað Bændakórinn, forvera Heimis. Stefán R. Gíslason, hefur verið söngstjóri kórsins nær óslitið frá 1985 sem segir sína sögu um ágæti þess skagfirska tónlistamanns. Undirleikari frá 1992 er hinn ágæti  píanisti Thomas Higgersson. Lengst allra hefur Þorvaldur Óskarsson á Sleitustöðum gegnt formennsku eða frá árinu 1973 til haustsins  2000 eða í 27 ár samfellt .

Karlakórinn Heimir hefur verið eitt sterkasta kennitákn fyrir ímynd Skagfirðinga öll þessi 80  ár og stolt héraðsbúa. Ekki er á aðra hallað þó þeirra hjóna Þorvaldar G. Óskarssonar og Sigurlínu Eiríksdóttur  sé  sérstaklega getið hér og þakkað fyrir mikilvirkt og óeigingjarnt starf í þágu Karlakórsins Heimis og  sönggyðjunnar .

„Innsta þrá í óskahöllum“

Þegar horft er yfir hópinn má sjá að enn eru það afkomendur og frændgarður höfuðsnillinganna  og brautryðjendanna, sem setja sterkan svip á kórinn. Tár blika á hvarmi og  stolt vefur saman hópinn allan  er hátt í 600 hundruð manns  rísa úr sætum og hylla þar með kórinn sinn  og Skagafjörð þegar sungið er lokalag hátíðarinnar , þjóðsöngur héraðsins,  „Skín við sólu Skagafjörður“.

Lokaorð Konráðs Gíslasonar í bókinni , Söngur í 60 ár, sem gefin var út af tilefni 60 ára afmælis Heimis eiga vel við enn í dag. : „Líftaugar Heimis hafa ævinlega átt rætur í ágætustu eigindum manna,  óeigingirni, fórnfýsi, ást á söng  og félagslegri samkennd. Megi svo haldast um alla framtíð“.

Til hamingju Karlakórinn Heimir  og  þökk fyrir frábæra söngveislu