Katrín taki yfir samningana við ljósmæður

Löngu er  ljóst að  fjármálaráðherra  ræður ekki við samninga og samskiptin við ljósmæður. Þar virðist komin upp þrákelknisleg störukeppni af hálfu samninganefndar ríkisins sem algjör raun er að horfa á. („Engin lausn í sjónmáli“ )

Fjármálaráðherra, Bjarni Benediktsson hefur borið samningsábyrgðina fyrir hönd ríkisins gagnvart ljósmæðrum án nokkurs sýnilegs árangurs og neikvæðan ef eitthvað. Uppsagnir ljóðsmæðra halda  áfram. Það er komið neyðarástand sen verður að takast á við af alvöru.

Ábyrgðin er nú forsætisráðherrans

Forsætisráðherra, Katrín Jakopsdóttir verður að sýna þann myndugleik og ábyrgð að taka samskiptin við ljósmæður af fjármálaráðherranum, en til þess hefur hún fulla heimild til innan ríkisstjórnar.

Hún getur falið ábyrgðina öðrum ráðherra eða farið með hana sjálf.

Neyðarástand sem verður að leysa úr

Ljósmæður hafa verið kjarasamningslausar í fleiri misseri og nú blasir neyðarástand við. Barnshafandi konur búa við aukna óvissu og öryggisleysi.

Landsmenn krefjast þess að samningamálin víð ljósmæður verði tekin úr þessari þrákelknislegu störukeppni stjórnvalda og   sett í jákvæðan og trúverðugan farveg sem skili árangri. 

Vilja gera Sigríði safnstjóra að heiðursborgara Skagafjarðar

Sigríður Sigurðardóttir safnstjóri Byggðasafnsins Skagfirðinga hefur lyft grettistaki í menningarmálum Héraðsins á 30 ára starfsferli sínum.  Byggðasafnið í Glaumbæ, söfnun og varðveisla muna, rannsóknir, fornleifar eru eitt af stærstu kennileitum Skagafjarðar. Glaumbær er einn vinsælasti áningarstaður ferðmanna landsins.

Yfirlýsing framboðs VG og óháðra í Skagafirði um að gera Sigríði að heiðursborgara fyrir vel unnin störf er mjög vel við hæfi. Vonandi fáum við að njóta atorku Sigríðar og fagþekkingar um mörg ókomin ár.

Vilja gera Sigríði að heiðursborgara

Vinnubrögð Landsnets sérstakt vandamál

Forstjóri Landsvirkjunar gangrýnir Landsnet fyrir léleg vinnubrögð og slaka stjórnsýslu  í útvarpsviðtali í morgun eða þannig skil ég orð forstjórans:

"Að þá hefur Landsnet í raun og veru ekki fengið að byggja eina einustu línu ( síðan  það var stofnað 2003 j.b.) ef frá er talið að tengja nýjar virkjanir Landsvirkjunar við Búðarháls og við Þeistareyki. Og það er í rauninni alveg ótrúlegt miðað við hvað samfélagið hefur breyst og bara gamlar byggðalínur ganga úr sér".  

Hér hlýtur að vera eitthvað meiriháttar að í stjórnsýslu og vinnubrögðum Landsnets.

Landsnet er opinber þjónustustofnun í eigu almennings. 

Nánast hvarvetna þar sem Landsnet hefur komið að hafa vinnubrögð og framganga fyrirtækisins valdið deilum. Vinnubrögðin hafa verið talin oft ófagleg og einkennast af frekju og yfirgangi.

   Var stofnun þessa fyrirtækis óþörf á sínum tíma? Hefur það aðeins leitt til aukins kostnaðar og silkihúfupýramída í raforkumálum landsmanna?

Allavega gengur það ekki að þjónustufyrirtæki í almannaþágu veki hvarvetna upp deilur og ásakanir um léleg vinnubrögð.

Stjórnvöld hljóta að taka tilvist og stjórnsýslu Landsnets til fullkominnar endurskoðunar frá grunni.

 

Raforkuskortur, segir forstjóri Landsvirkjunar

   

Fjöldamorð á Gaza

Tugir óvopnaðra Palestínumanna hafa ferið felldir af Ísraelsher og þúsundir  borgara særst  Hvað gerir alþjóðasamfélagið? Hvað gerir ríkisstjórn Íslands.

Eiga Ísraelsmenn að komast upp með að fremja fjöldmorð á Palestínumönnum án þess að nokkur hreyfi legg né lið?

Blóðbað á Gaza

Að ausa fé í Brüsselskrifstofu !

Svo fáráanlegt sem það er stefnir ríkisstjórnin á að stórauka fjármagn og mannafla til sendiráðsskrifstofunnar hjá ESB og EES í Brüssel. Væri ekki nær að segja upp EES samningum og setja kraftinn í tvíhliðasamninga í stað þess að púkka upp á löngu trénaðan ESB/ EES samning 

Sendiráðið í Brussel verður styrkt

Rislítil ræða landbúnaðarráðherra á Búnaðarþingi

Búnaðarþing var sett víð hátíðlega athöfn í Súlnasal Hótel Sögu í morgun. Kjarkleysi landbúnaðarráðherra gagnvart kröfum ESB olli miklum vonbrigðum

Formaður Bændasamtakanna, Sindri Sigurgeirsson flutti kraftmikla ræðu þar sem lögð var áhersla á mikilvægi íslensks landbúnaðar  hollustu matvæla og nýtingu og verndun náttúrulegrar landgæða  og  traustrar búsetu um allt land. 

Stjórn Bændasamtakanna hafði sent landbúnaðarráðherra skriflegar spurningar um hver væri afstaða hans til krafna ESB um innflutning á hráum ófrosnum kjötvörum og afléttingu tollverndar. Hvoru tveggja mun veita ESB ríkjum heimild til hömlulítils innflutnings á landbúnðarvörum til landsins,   sem þó væru framleiddar hér á landi á umhverfisvænan og heilbrigðan hátt.

Vildi formaður Bændasamtakanna að stjórnvöld tækju upp beinar viðræður við pólitíska forystu ESB til þess að tilkynna og treysta þennan fullveldisrétt Íslands og að Alþingi réði ferð í matvæla- og fæðuöryggi þjóðarinnar. Mikilvægt væri að við hefðum sjálf vald til að geta  verndað einstæð eigin búfjárkyn okkar gegn framandi erlendum sjúkdómum. 

Ræða ráðherra Kristjáns Þórs Júlíussonar olli miklum vonbrigðum. En þar var því lýst yfir að hann hygðist leggja fyrir Alþingi tillögur til breytinga á matvælalöggjöfinni þar sem fallist væri á allar kröfur Evrópusambandsins  um frjálsan innflutningu á hráum ófrosnum kjöyvörum og ógerilsneyddri mjólk og hráum eggjum.

Lítt myndi ráðherra reyna að sporna gegn óheftum innflutningi á landbúnaðarvörum til landsins  með tollvernd eins og þó flestar aðrar þjóðir gera. 

Undirgefni ráðherra gagnvart kröfum ESB og framsal á fullveldisrétti Íslendinga til að ráða sínum eigin málum sem varða sjálfsákvörðunarrétt var  hreint ótrúleg. 

Ég trúi því ekki að það verði framlag ríkisstjórnar Katrínar Jakobsdóttur til afmælishátíðar 100 ára fullveldis þjóðarinnar að framselja til ESB  valdið til að ákveða um fæðu og matvælaöryggi Íslands.

Það var athyglisvert að Meri Remes, fulltrúi finnsku  Bændasamtakanna sem ávarpaði þingið hvatti bændur og stjórnvöld til að standa fast á fullveldisréttinum  í hráakjötsmálinu. Flutti hún mál sitt á fallegri íslensku

Meri Remes minnti jafnramt á að það gæti blásið kalt um fæturna í þeirri baráttu og afhenti hún þykka finnska ullarsokka til að klæðast í stríðinu sem framundan væri í þessum efnum.

 

Var ólíkt að heyra til hennar í hvatningu til íslenskra bænda en landbúnaðarráðherra ríkisstjórnarinnar sem virtist hafa það eitt til að leggjast marflatur fyrir kröfum ESB.

Var mér hugsað til Haraldar Benediktssonar fyrrverandi formanns Bændsamtakanna, en við stóðum þétt saman og höfnuðum þessum kröfum ESB, þegar ég var ráðherra og hann formaður samtakanna.

Haraldur sem 1. þingmaður Norðvesturkjördæmis gegnir nú lykilsstöðu á Alþingi og allir unnendur íslensks landbúnaðar hljóta að horfa m.a. til hans eftir þessa ótrúlegu ræðu flokksbróður hans

Barnasáttmálinn og velferð barna

Barnasáttmáli Sameinuðu þjóðanna er ein merkasta samþykkt sem alþjóðasamfélagið hefur sett sér.

Sáttmálinn kveður á um fortakslausan og sjálfstæðan rétt barns sem einstaklings til skilgreindra eigin mannréttinda og verndar sem hverju samfélagi ber skylda til uppfylla og standa vörð um. Alþingi Íslendinga samþykkti Barnasáttmálann fyrir sitt leyti 2013 og verulegur hluti hans hefur þegar verið leiddur í íslensk lög og framkvæmd, þótt enn megi gera miklu betur á ýmsum sviðum hans.

Til framtíðar

Barnasáttmálinn vísar veginn til framtíðar en sum lönd og samfélagshópar  eru tregari en aðrir til að mæta strax öllum kröfum hans. Þannig er það því miður oft hjá einstaklingum og hópum sem ekki  geta varið eða sótt sjálft rétt sinn og í þessu tilviki eru það  börnin.

Velferð og þarfir barna eru  forgangsmál

Það er forgangsmál að treysta réttarstöðu og bæta þjónustu við börn m.a. á sviði heilbrigðisþjónustu, sálgæslu, mannúðar  mennta,- og félagsþjónustu svo dæmi séu nefnd. Erfið staða margra  barna og unglinga í dag er hrópandinn í íslensku samfélagi og ber þar margt til.

  Fyrsta boðorð í þeim efnum er að virða  mannréttindi þeirra sem einstaklinga, þarfir og velferð. Það er síðan samfélagsins að uppfylla skyldur sínar við börnin, mæta þörfum þeirra og tryggja velferð og þroska hvers og eins.

Umboðsmaður barna 

Frumvarp til laga sem kveður á um að banna umskurð drengja liggur nú fyrir alþingi. 

Umboðsmaður barna hefur sent frá sér álit um málið en þar segir:

" Barnasáttmáli Sameinuðu þjóðanna sem samþykktur var á Íslandi 2013 er nokkuð afdráttarlaus  þegar kemur að réttindum barna gagnvart slíkri aðgerð ". ( Umboðsmaður barna á Íslandi styður umskurðarfrumvarpið )

Undir þessi sjónarmið umboðsmanns barna er tekið heilshugar.

Sjálfsagt er að kanna hvort ekki séu nú þegar fyrir hendi bein ákvæði í íslenskum lögum sem tryggja réttarstöðu barns í þessum efnum og sem  gæti þurft að skýra og virkja betur.

Tryggja þarf réttarstöðu barna með lögum

   Einnig má velta fyrir sér hvort lagaákvæði sem tryggja sjálfstæða réttarstöðu barna  eigi betur heima t.d. í barnalögum eða lögum um heilbrigðisþjónustu, en þar má taka á mannréttindum barns og skyldum samfélagsins gagnvart því með heildstæðum og afdráttarlausum hætti 

Velferð barna forgangsmál

Gott hjá Ásmundi Einari Daðasyni nýjum félagsmálaráðherra að setja börnin í forgrunn. Velferð barna og unglinga, þarfir þeirra, og utanumhald er brýnt að taka á og styrkja.

 Þetta eru góðar áherslur sem koma fram í viðtali við nýja félagsmálaráðherrann.   Ásmundi  Einari  er óskað velfarnaðar í starfi.

Velferð alls samfélagsins í húfi

Guðmundur Ingi - "Ráðherra náttúru landsins"

"Ég verð að sjálfsögðu umhverfisráðherra allra landsmanna en kannski fyrst og fremst náttúru landsins"  sagði nýr umhverfisráðherra Guðmundur Ingi Guðbrandsson í viðtali við ( Rúv. 03.12. Verður fyrst og fremst ráðherra náttúrunnar )

Náttúruvernd og umhverfismál hafa oft lent á hliðarlínunni í pólitískum ákvarðanatökum á undanförnum árum. Virðing fyrir náttúrunni og framtíðarsýn hefur oft verið takmörkuð og lotið í lægra haldi fyrir skammatíma gróðasjónarmiðum. Það er gott að náttúran hafi fengið góðan talsmann í ríkisstjórn

Óheppinn formaður Vestfjarðarstofu

Það var dapurt að heyra nýjan formann Vestfjarðarstofu á Ísafirði hnjóða í umhverfisráðherrann fyrir fram og draga trúverðugleika hans í efa. ( Hefur áhyggjur af nýjum umhverfisráðherra. Rúv 03.12.)

 Vafasamt er í hvers umboði formaður Vestfjarðarstofu  getur látið slík orð falla í garð ráðherrans, en það er alveg klárt að hann er hvorki að styrkja ímynd Vestfjarða né gera umræðunni gagn með þeim. 

 Einstæð náttúra Vestfjarða

Vestfirðir státa af einum dýrustu náttúruperlum landsins og einstæðu lífríki sem við öllum berum okkar ábyrgð á.  Að sjálfsögðu er byggðin og búsetan hluti af þeirri heildar mynd allri.  

 

Að standa í lappirnar á þjóðrétti Íslendinga

Það vantar pólitíska forystu í landbúnaðarráðuneytið til að fara með hagsmuni og ábyrgð Íslands á alþjóðavettvangi.

Nýfallin er dómur Eftirlitsstofnunar Efta um að við þurfum að fara að viðskiftakröfum ESB og heimila innflutning á hráum ófrosnum kjötvörum og öðru hrámeti úr í landbúnaðarafurðum.

Viðbrögð ráðuneytisins  var að bugta sig og beygja fyrir þessu erlenda valdboði með ráðherrann þar í fararbroddi.

  EES samningurinn hefði aldrei verið samþykktur á Alþingi ef landbúnaður, fiskveiðar og matvæla- og dýraheilbrigði hefði ekki verið þar undanskilinn.   

Vissulega var þessi innflutningur á hráu ófrosnu kjöti  ein af kröfum Evrópusambandsins fyrir inngöngu Íslands í Sambandið.

Undir það voru margir ESB aðildarsinnar reiðubúnir að gangast.

Það þarf  ekki að koma á óvart að einn harðasti ESB sinninn í ríkisstjórn skuli sem landbúnaðarráðherra  fagna þessum Eftadómi og útvíkka áhrif hans sem mest.

Staðreyndin er hinsvegar sú, að Ísland er ekki aðili að stefnu ESB í landbúnaðarmálum og því hefur dómurinn ekki lögsögu yfir stefnu og aðgerðum íslenskra stjórnvalda í þeim málaflokki, né heldur byggða og búsetu málum. 

Enn fremur er kveðið á um í 13. grein EES samningsins að aðildarríki geti gripið til aðgerða "til verndar heilsu manna og dýra" í sinu heimalandi.

Ísland er fullvalda ríki og hlýtur sjálft að meta til hverra aðgerða það telur nauðsynlegt að grípa til í því skini.

Efta dómstóllin kvað upp úrskurð sinn á hreinum tæknilegum, viðskiptalegum forsendum eins og um væri að ræða iðnaðarvöru í alþjóðlegri samkeppni. 

Það er svo sem eðlilegt því hann hefur ekki lögsögu í málum sem varða fullveldisákvarðanir Íslendinga eða málum sem ekki heyra á neinn hátt undir dóminn.

Það sést best á að hann forðast að taka afstöðu til 13. greinar EES samningsins um sjálfstæðan rétt þjóða til  grípa til aðgerða "til verndar heilsu manna og dýra". 

Við erum líka aðilar að alþjóðlegum samningum um verndun einstæðra búfjártegunda og dýra afbrigða sem gætu verið í útrýmingarhættu. Það gildir einnig um byggð og búsetu  og  verndun menningar á dreifbýlum svæðum  Þannig má áfram telja.  Það er á ábyrgð hverrar þjóðar að axla þar ábyrgð á eigin forsendum.

Það er því í sjálfu sér fagnaðarefni að Efta-dómurinn skuli ekki fara inn á svið sem hann hefur enga lögsögu yfir.

 Lögin voru sett  á Alþingi Íslendinga 2009  við innleiðingu matvælalögjafar ESB.

Þar var kveðið á um að  viðhalda banni á innflutningi á hráum kjötvörum, mjólk og eggjum.

Lögin vöru samþykkt mótatkvæðalaust.

Þau lög standa  þar til og ef Alþingi breytir þeim.

Til þess að svo verði gert þarf meiri og aðrar röksemdir  en dóm Efta dómstólsins varðandi viðskipti með almennar framleiðslu- og iðnaðarvörum.

Íslensk stjórnvöld þurfa að standa fast í þessu máli, ákveðið og pólitískt og allsekki gefa neinar væntingar um að því verði breytt.

Ég efast um að nokkrir raunverulegir pólitískir valdsmenn í Brüssel hafi sannar hugmyndir um þetta mál.

Heldur séu það eingöngu lægra settir embættismenn landanna sem "lifa og hrærast í skriffinsku  kerfinu" drifin áfram af íslenskum innflutningsfyrirtækjum sem sjá sér mikla gróðavon í að rústa innlendu dýraheilbrgigði og íslenskum búfjárkynjum og þar með innlendri matvælaframleiðslu og búsetumynstri.

Ég get nefnt dæmi sem tekist var á um í minni ráðherra tíð þegar setja átti bann á útflutning á saltfiski frá Íslandi til ESB landa. 

Þá var setttur pólitískur starfshópur undir forystu Atla Gíslasonar alþingismanss og hæstaréttarlögmanns og rætt beint við pólitíska ráðamenn í Brüssel. Og eftir nokkra fundi fékkst bannið féllt niður.

Þetta mál um bann við innflutningi á hráu kjöti  þarf öfluga pólitiska forystu sem hefur bæði sjálfstraust og  styrk til að taka það út úr embættiskerfinu og verja og sækja pólitiskt á grundvelli  fullveldisréttar Íslendinga.

Þeim sjónarmiðum þarf að koma beint og milliliðalaust til æðstu valdamanna ESB.

Ef það gengur ekki  þá þarf krefjast endurskoðunar á EES samningnum ef þurfa þykir.

Það ætti þó ekki að vera nauðsynlegt til þess að tryggja okkar eigin fullveldisrétt sem við ráðum sjálf sem þjóð eins og í þessu máli.