Orkutilskipun ESB - Afsal á auðlindum

Utanríkisráðherra tilkynnti að ríkisstjórnin hyggðist fallast á kröfur ESB og afhenda þeim yfirráð og stjórnun orkumála á Íslandi.

 "Íslenskt ákvæði" og ESB ! !

Reyndar átti að samþykkja  með sýndar fyrirvara til að líta betur út inanlands, "íslenskt ákvæði": Þegar kæmi krafan um útflutning rafmagns um sæstreng  bauð hann að Alþingi myndi fjalla sérstaklega um það.

Svo vel þekki ég til í samningum við ESB frá minni ráðherratíð  að þar eru engir raunverlulegir fyrirvarar eða undanþágur til í orðabók ESB.  

Slíkt er blekking og það veit utanríkisráðherra mæta vel. 

Hráakjötið og ESB

Nægir að minnast innleiðingu Matvælalöggjafar ESB þar sem Alþingi Íslendinga taldi sér heimilt að setja  inn "Íslenskt ákvæði" til verndar hreinleika og heilsu íslensks búfjár og  standa vörð um hollustu innlendra matvæla.

En sá fyrirvari var samþykktur á Alþingi 2009 samhljóða, án mótatkvæða. 

Nú virðist það vera hlutskipti Alþingis að stimpla niðurstöðu kærudóms ESB og samþykkja umrætt undanþáguákvæði samkvæmt skipun frá ESB. 

Hafna ber orkupakka ESB

Ríkisstjórnin samþykkti á fundi sínum í morgun að leggja fyrir Alþingi þriðja orkupakka Evrópusambandsins. Tillagan inniheldur fyrirvara um að sá hluti er snýr að flutningi raforku yfir landamæri komi ekki til framkvæmda nema með aðkomu Alþingis á nýjan leik. Leggja til orkupakka með fyrirvara

Við getum sett okkar eigin lög um einhver þau ákvæði sem þar stendur og eru til bóta  en undanþágur og fyrirvari er alvarleg sjálfsblekking.

"Karlaveldið í ESB"

Og Karlveldið í ESB kann að taka á móti kvenforsætisráðherrum. 

Samkvæmt fréttum  Ríkisútvarpsins  fengu forsætisráðherrar Íslands og Bretlands ólíkar viðtökur í Brüssel í gær.

Bretar standa í miklum hremmingum að ná fullveldi sínu til baka frá ESB og Theresa May stendur í ströngu við karlaveldið í Brüssel.

 "Katrín kysst og knúsuð á leiðtogafundi ESB" 

 "Minna hlegið á blaðamannafundi May " 

Katrín Jakobsdóttir forsætisráðherra Íslands  kemur með skilaboð utanríkisráðherra og iðnaðarráðherra um að þau vilji innleiða Orkupakka ESB númer 3 og afhenda þar með yfirráð orkumála Íslendinga til Brüssel.

Auðvitað gleðjast allir "Junkerarnir" og "Tuskarnir" og "Macronarnir"  í Brüssel.

Þetta með hráakjötið og barátta Íslendinga fyrir því að varðveita einstök íslensk  búfjárkyn og hollustu innlendra matvæla er svona auka atriði!

Katrín hefur sterka stöðu sem hún þarf að beita

Katrín Jakobsdóttir forsætisráðherra hefur bæði pólitískan styrk og stöðu til að hafna alfarið Orkupakka 3 og gera utanríkisráðherra, Guðlaug Þór Þórðarson afturreka með sína ESB þóknun og undirlægju.

Katrín hefur stöðu til að  afneita kröfum ESB um innflutning á hráu ófrosnu kjöti. Þar með yrði stuðlað að vernd íslenskra búfjárins og hollustu innlendrar matvælaframleiðslu.

Eins og oft áður: " Vilji er allt sem þarf".  

 

"Árinni kennir illur ræðari"

 

Traust til Alþingis og Borgarstjórnar Reykjavíkur hrynur. 

 

Hver mun þar kenna öðrum um í stað þess að líta af hógværð í eigin barm

"Traust til Alþingis hefur hrunið niður að und­an­förnu og er nú um 18 pró­sent þjóð­ar­innar sem treystir því. Það er um 11 pró­sentu­stigum minna en þegar þjóð­ar­púls Gallup mældi það síð­ast. 

Frá þessu greindi RÚV í kvöld.

Banka­kerfið mælist með 20 pró­sent traust, og hefur und­an­farin ára­tug verið í neðsta sæt­inu, en er nú í þriðja neðsta sæti. Minnst er traustið til borg­ar­stjórnar Reykja­víkur og Alþing­is. Borg­ar­stjórn með 16 pró­sent og Alþingi 18, eins og fyrr seg­ir".

Alþingi og Borgarstjórn Reykjavíkur njóta minnst trausts almennings, sem eru alvarleg skilaboð til þeirra sem þar stýra ferð.

Nú þarf hver að líta í eigin barm en ekki stöðugt horfa til þóftunautar síns og kenna honum um eins og við munum þó vafalaust verða vitni að,  því miður.

 

Staða barns við andlát foreldris

Mælt hefur verið fyrir frumvarpi á alþingi sem kveður á um rétt barna og frumkvæðisskyldur velferðarþjónustunnar gagnvart þeim, þegar foreldri eða annar mjög nákominn andast eða er haldið langvinnum og jafnvel banvænum sjúkdómi: Hægt er að nálgast frumvarpið á slóðinni:

" Réttur barna sem aðstandendur"

 https://www.althingi.is/altext/149/s/0273.html...

 Fyrsti flutningsmaður frumvarpsins er Vilhjálmur Árnason alþm. en meðflutningsmenn eru nánast úr öllum flokkum á alþingi og nýtur frumvarpið víðtæks stuðnings. 

Undanfarin ár hef ég, persónulega hvatt til rannsókna á stöðu barna við andlát foreldris og  hvernig mætti breyta lögum og verkferlum til að styrkja stöðu þeirra og sjálfstæðan rétt til þjónustu og utanumhalds við stóráföll sem andlát foreldris er. 

Málefnið naut frá upphafi öflugs stuðnings Ólafar Nordal þ.v. innanríkisráðherra, en hún lést því miður fyrir  tveim árum frá börnum sínum og eiginmanni. En stuðningur hennar og hvatning á stóran þátt í að mál barna sem missa foreldri sitt er komið þetta langt á dagskrá með umræddu frumvarpi.

Ég fagna því mjög þessu frumvarpi sem er einn liður í því að treysta rétt og velferð barnanna á þeirra eigin forsendum við stóráföll í lífi þeirra. Er mér ljúft að fylgja efni þess að nokkru eftir með fáeinum orðum.

Mikil vakning er nú í samfélaginu um að styrkja stöðu og velferð þessara barna og er frumvarpið einn liður í þeirri ferð  

Það er óafturkræft áfall fyrir barn, þegar foreldri þess andast og gjörbreytir tilveru þess og stöðu í lífinu.

Talið er að milli 70 og 90 börn missi foreldri sitt á ári hérlendis en verið er að afla óyggjandi talna um þann fjölda. 

Rannsóknir hafa sýnt að það skiptir miklu máli fyrir  sjálfsmynd barnsins, þroska og velgengni á öllum æviskeiðum að haldið sé vel utan um það við slík stóráföll og því veittur stuðningur og öryggi allt til fullorðinsaldurs.

Eftirlifandi foreldri og aðrir nánir aðstandendur leggja mikið á sig fyrir barnið, en þau þurfa sjálf einnig  á öllum persónulegum stuðningi að halda.

Á undanförnum 4 árum hafa verið gerðar rannsóknir og úttekt  á stöðu barna þegar andlát foreldris ber að, hvernig utan um þau er haldið og hvort þeim sé tryggður eigin réttur til stuðnings og sorgarmeðferðar á barnskeiðinu til fullorðinsára eins og það þarf.

Dr. Sigrún Júlíusdóttir prófessor og forstöðumaður Rannsóknastofnunar í barna- og fjölskylduvernd hefur stýrt þessum rannsóknum af miklum metnaði ásamt fjölmörgum öðrum vísindamönnum og fagfólki í heilbrigðis- og velferðargeiranum.

Rannsóknaniðurstöðurnar hafa verið gefnar út í skýrsluformi og  byggir umrætt lagafrumvarp m.a. á niðurstöðum þeirra. Einnig eru sóttar fyrirmyndir í það sem gert er í nágrannalöndum okkar.

Rannsóknirnar leiða í ljós miklar brotalamir á utanumhaldi og stuðningi við börn í þessum aðstæðum hér á landi. Engir skipulegir verkferlar eru til staðar gagnvart börnum við andlát foreldris. Lögverndun  á rétti og þjónustu þessara barna er mjög veik svo og skyldur starfsfólks og stofnana sem að þeim eiga að koma. 

Það sem er gert við þessar sérstöku aðstæður barna hvílir að stórum hluta á framtaki einstaklinga í heilbrigðis- og velferðarþjónustunni, aðstandendum barnsins og presta. Er þar margt vel unnið.

Rannsóknirnar sýna einnig mikilvægi þess að virkja stórfjölskyldu barnsins, ekki aðeins meðan á veikindum stendur eða við andlátið, heldur einnig og ekki síður árin eftir andlát allt til fullorðinsára. Er það mikilvægur þáttur í sorgarúrvinnslu barns.

Það gildir ekki hvað síst um fjölskyldu hins látna foreldris, ömmur og afa, systkini hins látna og aðra nána sem skipta miklu máli fyrir þroska og sjálfsmynd barnsins. 

Rannsóknir dr. Sigrúnar sýna einnig að í alltof mörgum tilfellum hverfur fjölskylda látins foreldris út úr  daglegri tilveru barnsins innan fárra ára, ef ekki eru ræktuð bein, virk tengsl, samskipti og upplýsingagjöf.

 Rannsóknir dr. Sigrúnar benda einnig til þess að það þurfi  mun ákveðnari lagaramma, en nú er við andlát foreldris til þess að tryggja virkan frumrétt barnsins til fjölskyldu sinnar og uppruna þar með talið fjölskyldu hins látna foreldris.

  Krafa er því gerð í frumvarpinu um að hugað sé strax að grunnskipulagi og varðveislu virkra tengsla innan fjölskyldunnar við barnið  allt frá andláti foreldris til fullorðinsára barnsins. 

Þessu frumvarpi er ætlað að treysta eigin rétt barnsins við andlát foreldris og árétta frumkvæðisskyldur gagnvart því.

Jafnframt er kveðið á um formlega verkferla sem ber að stilla saman og fylgja eftir gangvart börnum  þegar langvarandi veikindi eða andlát foreldris ber að höndum.

Frumvæðisskyldan er fyrst hjá lækninum, heilbrigðisþjónustunni  sem sér um og fylgir barninu eftir ásamt skólunum og félagsþjónustunni. Er hér stuðst við skipulag heilbrigðis- og velferðarþjónustu við þessar aðstæður barna í nágrannalöndum okkar.   

Flutningsmönnum frumvarpsins og öllum þeim sem hafa komið að undirbúningi og samningi þess eru færðar þakkir.

 Vonandi fær þetta frumvarp vandaða og góða meðferð og verður afgreitt sem lög fyrir lok vorþings í ár.

  

 

Vegagerð að Bakka 5 milljarðar á ríkissjóð

Talið er að jarðgöng og vegagerð að kisilverinun á Bakka við Húsavík muni kosta ríkissjóð allt að 5 milljörðum króna og fari nær 20% fram úr kostnaðaráætlun. Er þetta vegur að einni verksmiðju, einum kolabrennslu vinnustað og er ekki ætlaður almennri umferð, enda var hann aldrei á neinni samgönguáætlun

Svo eru menn að velta fyrir sér og fjargviðrast yfir kostnaði vegna vegalagningu  á Vestfjörðum og Ströndum.

Varanlegur vegur um Barmahlíð í Reykhólasveit myndi hleypa upp allri samgönguáætlun, jarðgöng undir Klettsháls, jarðgöng milli Súðavíkur og Ísafjarðar er eitthvað sem engin má nefna í náinnu framtíð. Umræðan er hvorki sanngjörn né sannfærandi

Bakki kostaði ríkið 4,2 milljarða

Siðanefnd Blaðamannafélagsins ?

Í hádegisfréttum Bylgjunnar sl. laugardag buldu á landsmönnum æsingsfréttir þess efnis að Gunnar Bragi Sveinsson alþingismaður hefði verið drukkinn, með dólgslæti og frammíköll  á söngleiknum Elly í Borgarleikhúsinu fyrr í mánuðnum.  
Þarna voru fjölmiðlar komnir í feitt. Ýmsir aðrir fjölmiðlar fylgdu og dreifðu fréttinni 

https://viljinn.is/…/sonur-gunnars-braga-nu-er-maelirinn-f…/

https://www.frettabladid.is/…/segir-frettir-af-meintri-dryk…

  Sonur Gunnars Braga, Róbert Smári  brást sorgmæddur og sár við á fésbókarsíðu sinni.  
 „Nú er mælirinn fullur. Hvenær er komið nóg?“ spyr Róbert Smári Gunnarsson, í tilefni hádegisfrétta Bylgjunnar, þar sem fullyrt var að faðir hans hefði verið drukkinn og með frammíköll á leiksýningunni Ellý á dögunum. DV og Fréttablaðið sló svo fullyrðingum Bylgjunnar upp sem frétt sl laugardag".

Róbert Smári Gunnarsson

„Ég var á þessari sýningu með pabba og Sunnu þann 18. janúar. Pabbi bragðaði ekki áfengi fyrir sýningu, né á sýningu og ekki eftir hana,“ segir Róbert Smári í færslu á fésbókinni sem Viljinn fékk heimild til að vitna til.
"Hversu lágt er hægt að leggjast? Hvenær er botninum náð? Hvað fær ,,blaðamann” til þess að halda þessu fram og búa svona til? Hvað ætla fjölmiðlar að leggja mikið á fjölskyldur stjórnmálamanna?!“
Róbert Smári kveðst skrifa þetta „með tárin í augunum, sár og reiður, að svona skuli nokkur skrifa án vísunar til sannleikans og að leggja þetta á okkur, okkur sem vitum að þetta er haugalygi"
„Sýningin var góð, við skemmtun okkur vel, hann greip ekki fram í og var bláedrú, allir voru til fyrirmyndar. Og öll vorum við sammála að um einhverja flottustu sýningu sem við höfum séð væri að ræða,“ segir Róbert Smári.

Um heiðarleika og friðhelgi einkalífs

Hér er ekki verið að leggja neitt inn í umræðuna um atburðina á " Klausturbar" né heldur atburðarrásina sem á eftir fylgdi.

Hinsvegar er verið að leggja áherslu á grundvallaratriði  í blaðamennsku og friðhelgi einkalífs 
 Seinni part sl. laugardags  eftir að fréttin hafði staðið yfir allan hádaginn, nokkra klukkutíma, fann ritstjórinn sig knúinn til að biðjast afsökunar, fréttin  væri ósönn og rakalaus og afturkallaði hana. 

"Gróa á Leiti" 
 Svo gæti virst sem fréttamenn þar á bæ hafa talið sig geta sloppið í gegn án þess að nokkur hreyfði litla fingri til varnar.

Fréttin hefði á skömmum tíma orðið að sannleika "Gróu á Leiti" sem margir virðast dá þessa dagana.

Fjöldi annarra leikhúsgesta á sömu sýningu hefur tjáð sig á fésbók, staðfest orð Róberts Smára og lýst mikilli vanþóknun á fréttaflutningnum, sem nú hefur verið borinn til baka.

Róbert Smári Gunnarsson á mikinn heiður skilið fyrir kjarkinn og áræðið að skrifa þennan pistil og hrekja  söguburð "pressunnar" um föður sinn ,  " með tárin í augunum " eins og hann segir. 
 Ég get sjálfur ekki orða bundist og maður spyr sig hvert er samfélagsumræðan komin.  

Siðanefnd blaðamannafélagsins 

 Væri ekki tilefni til þess að Siðanefnd Blaðamannafélagsins færi yfir viðlíka fréttaflutning og kanna hvernig hann kemst áfram  þar sem bornar eru alvarlegar og ósannar  ávirðingar á einstakling sem þykir liggja markaðslega vel við höggi?.

 Frjáls fjölmiðlun, heiðarleg og vakandi fréttamennska eru hornsteinar lýðræðis og mannréttinda.

Línan um persónufrelsi, friðhelgi einkalífs, mannréttindi og sannsögli hefur verið teygð á síðustu vikum og misserum.

Falsfréttir vaða uppi  

Falsfréttir vaða nú uppi um allan heim, eru ógn við lýðræðið og gera enn ríkari kröfur til vandaðar blaðamennsku. 

Væri ekki rétt að Siðanefnd Blaðamannfélagsins fjallaði um og léti eitthvað frá sér fara um  þá breyttu stöðu sem komin er upp í fjölmiðlun bæði hér á landi og í heiminum.

Öll umfjöllun tengd  "Klausturmálinu" gæti einnig verðskuldað slíka innri athugun.

 Vonandi hafa ekki allir fjölmiðlamenn talað sig vanhæfa eins og forseti Alþingis telur sig hafa gert af forsetastóli þingsins. 

 Róbert Smári Gunnarsson á mikinn heiður skilið fyrir að taka svo vasklega upp varnir gegn ósönnum fréttaflutningi "Gróu á Leiti" um föður sinn.

 

 

Klókindi Theresu May - Nauðasamningum hafnað

Breska þingið hafnaði nauðasamningum og afarkostum sem ESB hafði gert Bretum.  Þar með getur breska ríkisstjórnin haldið útgönguferlinu áfram  með frjálsar hendur.

Klukkan 11 hinn 29. mars 2019

 Dagsetning útgöngunnar liggur fyrir og henni verður ekki breytt þótt trúlega verði þrefað um það næstu daga.

Klukkan 11 að breskum tíma hinn 29. mars mun Bretland ganga úr ESB

Nauðasamningarnir voru felldir með það miklum mun að litlar líkur eru á að viðræður um nýjan samning verði teknar upp, þótt framkvæmdastjórn ESB muni þrýsta verulega á um það.

Framganga og frekja ESB í þessum ferli hefur verið með ólíkindum og keppst var  við að niðurlægja Breta sem mest. 

Við getum nú séð hver örlög okkar Íslendinga hefðu verið ef ESB sinnum hér á landi hefði tekist ætlunarverk sitt að troða okkur þar inn. 

Fríverslunarsamningur við Breta

Færeyingar hafa tilbúinn fríverslunarsamning við Breta um leið og útgangan er orðin að veruleika. Það sama eigum við Íslendingar að gera.

 

Brexit-samningi May hafnað

Um makrílveiðar og Hæstaréttardóm

Makríllinn var nýr stofn innan íslenskrar fiskveiðilögsögu og veiðar rétt hafnar þegar ég varð ráðherra. Magn makríls fór mjög ört vaxandi í lögsögunni með stórum göngum inn á grunnmið, víkur og voga hringinn í kringum landið. Makríllinn hafði þá um skamman tíma verið veiddur í bræðslu á vegum örfárra stórra uppsjávarskipa.

2010 þótti rétt að taka utan um skipulagningu og þróun þessara veiða, sem var reyndar ósamið um líkt og enn þá er. 

Við stóðum í harðvítugum deilum við ESB um rétt okkar til makrílveiða. Og þessar útgerðir frekar en aðrir  hefðu ekki fengið mikinn afla í sinn hlut, ef ráðherra hefði ekki staðið fast á rétti Íslendinga til makrílveiða og staðið af sér  m.a. hótanir um viðskiptabann ef við héldum áfram veiðum á makríl.

Þá var ákveðið að skipta veiðiheimildum í makríl á útgerðarflokka þannig að stóru uppsjávarskipin sem höfðu eingöngu veitt til bræðslu fengu áfram meginhluta veiðiheimilda, frystitogarar og ísfiskskip fengu ákveðinn hluta, smábátar og línubátar tiltekinn hluta. Jafnframt var sett ströng skylda á manneldisvinnslu, sem stórjók verðmætasköpun aflans og skapaði fjölda mikilvægra starfa í fiskvinnslum vítt og breytt um landið.

Það var metið svo að ráðherra væri þetta heimilt þar sem m.a. væri um nýjan stofn að ræða sem ósamið var um.

Manneldiskrafan og þessi ráðstöfun veiðiheimilda skilaði stórauknum tekjum í þjóðarbúið, mikilli atvinnu,  ásamt vandaðri umgengni um auðlindina.

Að mínu mati ber ráðherra einnig að hafa í huga fyrstu grein fiskveiðistjórnunarlaga en þar segir:

" Nytjastofnar á Íslandsmiðum eru sameign íslensku þjóðarinnar. Markmið laga þessara er að stuðla að verndun og hagkvæmri nýtingu þeirra og tryggja með því trausta atvinnu og byggð í landinu"

Hæstiréttur hefur dæmt að þessi aðgerð hafi verið ólögleg. Ég harma það og er því ósammála.

Hæstiréttur virðist að mínu mati taka tímabundinn einkahag einstakra útgerða fram yfir þjóðarhag og almannahagsmuni.
Rétturinn horfir einnig  að mínu mati framhjá ofangreindri markmiðsgrein fiskveiðistjórnunarlaganna sem kveðið er á um í 1. grein.
Reglugerðin sem sett var 2010 heimilaði smábátum, línubátum, frystiskipum og ísfiskbátum að komast inn í veiðar á makríl, þessari nýju fisktegund sem var að ganga inn á Íslandsmið. Þessir útgerðarflokkar hefðu annars verið útilokaðir frá makrílveiðunum.
Dómur Hæstaréttar þýðir væntanlega að þessir útgerðahópar smábáta og minni skipa verði að skila veiðiheimildum sínum í makríl til þessara örfáu stóru uppsjávarskipa sem hafa sótt þetta mál til Hæstaréttar.

Menn geta svo sem haft sínar skoðanir á því, en varla gæti sú ákvörðun verið í þágu þjóðarhagsmuna.

Umræddar útgerðir eiga eftir að sanna hvert raunverulegt tjón þeirra eða ávinningur var af þessari reglugerðarsetningu.

Þessi makríll var allur veiddur og að mínu mati skilaði þessi ákvörðun miklum ávinningi fyrir þjóðarbúið og allan almenning í landinu og einnig fyrir stöðu okkar á alþjóðavettvangi um stjórnun  makrílveiða sem gagnast ekki hvað síst þessum umræddu útgerðum.

Halldór Kiljan Laxnes og Fullveldið

" Hættulegustu óvinir sérhverrar þjóðar eru æfinlega innlendir umboðsmenn sem geingið hafa hinu erlenda kúgunarvaldi á hönd og reka erindi þess innnanlands" sagði Halldór Kiljan Laxxnes í hátíðarræði 1. des 1935"

Í dag fögnum við aldarafmælis fullveldis Íslendinga. Við gleðjumst og sýnum styrk sjálfstæðrar þjóðar í menningu, listum, fjölþættu atvinnulífi, sögu og öflugu þjóðlífi. Til hamingju stolt íslensk þjóð.

En fullveldisbaráttan var og er ekki bara "kabarett" eða sýning á skrautbúnu fólki og hvítum flibbum með glitrandi orðum. Baráttan fyrir fullveldi og sjálfstæði þjóðarinnar er eilíf

Sjálfstæðið er sívirk auðlind( Ragnar Arnalds í samnefndri bók) 
Baráttan fyrir eigin landhelgi og 200 mílna fiskveiðilögsögu kostaði blóð svita og tár en var einn lykillin að sjálfstæði okkar sem þjóðar.

Fullveldið felst m.a. í því að ráða verndun og nýtingu náttúru auðlinda okkar.
Fróðlegt verður að sjá hvernig þess sjálfstæðisfáfanga sem landhelgisbaráttan skilaði okkur verði minnst í dag.

"Umboðsmenn hins erlenda kúgunarvalds" og ESB umsóknin

Þeir sem sóttu um aðild að ESB  2009 voru reiðubúnir að fórna fullveldi okkar og þar með forræðinu yfir fiskveiðiauðlindinni til ESB enda var það það ófrávíkjanleg krafa Sambandsins. Þessu kynntist ég vel sem ráðherra sjávarútvegsmála meðan á ESB umsókninni stóð og hafnaði þessar kröfu ESB alfarið. Takið eftir: 

Núna i skrúðgöngunum í dag munu stjórnmálamenn og aðrir sem að ESB umsókninnni stóðu  berja sér á brjóst, hneykslast á öðrum, skammast sín hvergi og þóst hvergi hafa komið  þar nærri. Halldór Laxnex kann að koma orðum um slíka menn:

" Hættulegustu óvinir sérhverrar þjóðar eru æfinlega innlendir umboðsmenn sem geingið hafa hinu erlenda kúgunarvaldi á hönd og reka erindi þess innnanlands" sagði Halldór Kiljan Laxxnes í hátíðarræði 1. des 1935"

Þessi orð eru jafn sönn í dag. Slíkir menn munu því miður ávalt verða til og  kunna að villa á sér heimildir eins og dæmin sanna.

Umsókn að ESB var aðför að fullveldi þjóðarinnar

Alvarlegasta aðförin að sjálfstæði þjóðarinnar hin síðari ár var hin fyrirvaralausa umsókn um inngöngu  Íslands í ESB, sem send var sumarið 2009. Hefði sú umsókn náð fram að ganga eins og stuðningsmenn hennar  börðust fyrir, værum við nú ekki að fagna 100 ára fullveldi sem sjálfstæð þjóð. Svo tæpt getur þetta fjöregg okkar staðið óbrotið.

 Barátta Breta og hótanir ESB

Barátta Breta til að losna undan yfirráðum ESB valdsins í Brussel og þeir afkostir og hótanir sem þeir mega þola sýna í hnotskurn hvaða erindi við hefðum átt þarna inn.

Við sem stóðum í þessari baráttu gleðjumst þvó okkur tókst að stöðva ESB- umsóknina og  koma í veg fyrir að fullveldið þjóðarinnar yrði framselt til Brüssel. Það er hins vegar  kaldhæðnislegt að horfa á suma þá sömu sem beittu sér hvað harðast í að koma okkur í ESB  ganga nú í fylkingarbrjósti hátiðahalda aldar afmælis fullveldisins. Hvernig verður ESB umsóknarinnar minnst í hátíðarhöldum dagsins? Mér verður hugsað til ræðu Halldórs Laxness

3.Orkupakki ESB - Framsal á fullveldi

Og enn er tekist á um fullveldið: Svokallaður 3. Orkupakki ESB er í prentun sem þingmál ríkisstjórnarinnar til staðfestingar. Hann felur í sér mögulegt framsal á yfirrráðum Íslendinga og  forræði yfir orkuauðlindum okkar og ráðstöfun raforku sem unnin gæti verið.

Það á að horfa til framtíðar, verður minnst á þá baráttu sem er framundan  um orkuauðlindir þjóðarinnar í hátíðarræðum dagsins?

 Landbúnaður, matvæla og fæðu öryggi þjóðarinnar - Hráakjötsmálið

Tekist er á um fullveldisrétt okkar til að taka eigin ákvörðun um matvæla- og fæðu öryggi þjóðarinnr, beita nauðsynlegum verndar aðgerðum til að tryggja lýðheilsu og heilbrigði búfjárkynja okkar, öfluga og holla matvælaframleiðslu. Verður minnst á þessi mál í hátíðar og barátturæðum dagsins?

Ræða Halldórs Laxnes 1. des 1935
Mér verður hugsað til hátíðarræðu Halldórs Laxness af svölum Alþingishussins 1. des 1935.

"Fullveldi íslenska ríkisins, sem var viðurkent 1918, var rökréttur árángur af starfi allra þessara manna. En um leið og vér hugsum til þeirra allra með lotníngu og þakklæti erum vér einnig minnugir hins sögulega lögmáls, að erlendu kúgunarvaldi hefur aldrei tekist að halda þrælatakinu á neinni þjóð nema því aðeins að þetta útlenda kúgunarvald ætti sterka málsvara, leppa eða umboðsmenn innan þjóðarinnar sjálfrar. Þetta hefur svo til geingið hjá oss í sögu fortíðarinnar, einsog hjá öðrum þjóðum sem lotið hafa erlendu kúgunarvaldi, og það mun einnig svo til gánga í nútíð og framtíð:

Hættulegustu óvinir sérhverrar þjóðar eru æfinlega innlendir umboðsmenn sem geingið hafa hinu erlenda kúgunarvaldi á hönd og reka erindi þess innnanlands. Þessir menn eiga sitt lángfeðgatal í sögu þjóðarinnar eingu síður en frelsishetjurnar. Nafn Gissurar Þorvaldssonar er þeirra nafn, ætt þeirra hans ætt"

Nóbelshöfundurinn Halldór Kiljan Laxness er einn af hinum stóru nöfnum í fullveldissókn þjóðarinnar sem við nú höldum hátíðlega.
Ræðan sem hann flutti af svölum Alþingishússins 1. des 1935 á jafn vel við í dag, hvert einasta orð.

Ræða Halldórs Laxnes fylgir hér með sem holl og sígild lesning sjálfstæðrar þjóðar.

Ræða 1. desember 1935 haldin á fullveldisafmælinu

og útvarpað frá svölum Alþíngishússins 

Íslendíngar:

Enn einu sinni er runninn sá dagur sem gefur oss öllum tækifæri til að minnast dýrmætustu hugsjóna íslensks fólks, þeirra hugsjóna sem ekki aðeins á síðastliðnum öldum, heldur alt frá upphafi Íslandsbygðar hafa verið djúprættastar í þjóðerninu, máttarstólpi þess og tilverurök: hugsjón frelsisins, hugsjón sjálfstæðisins.

Í dag komum við öll saman einum huga sem sjálfstæðismenn, ýmist sem hermenn eða kyrlátir aðdáendur þess frelsis sem er hið æðsta takmark fólksins, kvikan í íslensku þjóðerni.

Þessi dagur er ekki helgaður neinum sérstökum flokki né grunnfánum þeirra, hann er ekki helgaður neinum sérhagsmunum neinna ákveðinna hópa sem berjast fyrir ákveðnum ávinníngum sér til handa, eða ákveðnum kennisetníngum, eða ákveðnum hindurvitnum, og þetta er síst af öllu dagur til að hylla nokkra sérstaka útvalda menn, eða sérstök einakaafrek og einkastofnanir sem hversdagslega fagna frelsi og sjálfstæði í tali og atferli einsog þessar hugsjónir og framkvæmd þeirra væru þeirra eigin einkamál".

 DAGUR HINNA MÖRGU

"Í dag er ekki dagur hinna einstöku eða hinna útvöldu, í dag er dagur hinna mörgu, sá dagur sem er helgaður málstað fólksins, þeirrar lífsheildar sem er kölluð íslensk þjóð, að þeim hundrað þúsund manns ekki undanteknum, sem í dag heya stríðið við óblíð öfl náttúrunnar til að skapa lífsverðmætin, ýmist á hinum grimmu höfum umhverfis Ísland, eða í hinum dreifðu bygðum landsins undir vorum norræna skammdegishimni, eða hinum lágu auðmjúku kauptúnum sem standa að fótum gneypra fjalla við gráan, úfinn fjörðinn".

Dagur þjóðernis og frelsis

"Í dag er dagur þessa fólks, — án flokkaskiftíngar og sérhagsmunamála, það er dagur þjóðernisins, dagur hins djúprættasta í íslensku þjóðerni, dagur frelsisins. Enn einu sinni erum vér saman komin hér á þessum degi til að nefna hið helga nafn frelsisins.

Nú er hér hvorki staður né stund til að koma fram með neinar fjarrænar og óhlutkendar skýríngar á frelsishugtakinu, hverju fólkið hefur barist fyrir á undanförnum öldum, og hverju það hlýtur að berjast fyrir enn þann dag í dag undir nafni frelsisbaráttunnar".

Jón Sigurðsson,Jón Arason, Baldvin Einarsson, Fjölnismenn ....

"Ég held að það sé ekki til ein mynd sem skýrir öllu betur frelsisbaráttu íslendínga á síðastliðnum öldum en myndin af Jóni Sigurðssyni hér á Austurvelli. Það er eingin flókin heimspekileg skilgreiníng á óhlutkendu hugtaki, heldur mynd af manni sem líf hans var holdgun þjóðviljans íslenska, vilja íslensks almenníngs til að varpa af sér erlendri yfirdrotnun, oki og hlekkjum. Ævistarf hans var ekki hugsær áróður fyrir óáþreifanlegum kenníngum, heldur barátta fyrir mjög áþreifanlegum umbótum á hversdagskjörum venjulegs fólks, það var barátta gegn verslunaryfirráðum og arðráni erlendra manna og stofnana á íslendíngum, og fyrir hagstæðari verslunarháttum; hann barðist fyrir því að arðurinn af vinnu og verðmætum íslenskrar alþýðu rynni ekki í sjóði erlendra yfirdrottna; hann barðist fyrir því að innlendri stjórn væru gefin forráð til að fara með fjárreiður landsins. Áður en vér höldum leingra, er oss skylt að bera oss einnig í munn nöfn annarra þeirra manna sem fremstir stóðu í baráttu liðinna alda fyrir frelsi voru, oss bera að nefna nafn Jóns Arasonar sem lagði höfuð sitt undir öxina í baráttunni fyrir sjálfstæði Íslands, og frá öldinni sem leið ber oss einnig að minnast bæði Baldvins Einarssonar og Fjölnismanna, sem á öndverðum dögum Jóns Sigurðssonar beittu sér fyrir velferðarmálum þjóðarinnar og vöktu hana til baráttu".

Verjumst leppum og þrælataki erlends kúgunarvalds

"Fullveldi íslenska ríkisins, sem var viðurkent 1918, var rökréttur árángur af starfi allra þessara manna. En um leið og vér hugsum til þeirra allra með lotníngu og þakklæti erum vér einnig minnugir hins sögulega lögmáls, að erlendu kúgunarvaldi hefur aldrei tekist að halda þrælatakinu á neinni þjóð nema því aðeins að þetta útlenda kúgunarvald ætti sterka málsvara, leppa eða umboðsmenn innan þjóðarinnar sjálfrar.

Þetta hefur svo til geingið hjá oss í sögu fortíðarinnar, einsog hjá öðrum þjóðum sem lotið hafa erlendu kúgunarvaldi, og það mun einnig svo til gánga í nútíð og framtíð: Hættulegustu óvinir sérhverrar þjóðar eru æfinlega innlendir umboðsmenn sem geingið hafa hinu erlenda kúgunarvaldi á hönd og reka erindi þess innnanlands. Þessir menn eiga sitt lángfeðgatal í sögu þjóðarinnar eingu síður en frelsishetjurnar. Nafn Gissurar Þorvaldssonar er þeirra nafn, ætt þeirra hans ætt.

Á þessum degi er eðlilegt að vér gerum það upp sem áunnist hefur í frelsisbaráttunni. Vér minnumst þeirra manna sem hefndu Jóns Arasonar. Vér minnumst þjóðernisvakníngar Fjölnismanna, sem var undanfari hinnar farsælu baráttu þjóðarinnar undir forustu Jóns Sigurðssonar. Og loks minnumst vér ársins 1918 þegar Ísland var viðurkent fullvalda ríki".

Unnir sigrar en baráttan heldur áfram

"En þegar vér lítum yfir unna sigra á liðinni tíð, er það þá aðeins til að hvílast í endurminníngum fornra afreka, einsog nú sé öllu náð sem var barist fyrir á undanförnum öldum, einsog nú væri frelsi og sjálfstæði Íslands feingið fyrir fult og alt og í eitt skifti fyrir öll?

Ég efast ekki um að til séu þeir flokkar og sérhagsmunastefnur, sem telji sér best borgið með því að búa til kenníngu um að frelsisbaráttu íslendínga hafi verið lokið fyrir 17 árum, — 1. desember 1918.

Hinum sem hugsa í meiri einlægni, öllum þeim hinum mörgu sem heill almenníngs, heill hins venjulega manns, er hið eina einkamál, gefur 1. desember 1935 sérstakt tilefni til að spyrja, — spyrja sjálfa sig og nágranna sína í sveit og kaupstað: Hvað líður frelsisbaráttu hinnar íslensku þjóðar, fólksins, almenníngs, hins venjulega manns, þín, mín? Er henni lokið? Eða heldur hún áfram?

Það er satt, íslenska ríkið er sjálfstætt, — því hefur að minsta kosti verið lýst yfir um allan heim. En íslenska fólkið, hinir hundrað þúsund menn og konur, sem skapa lífsverðmætin í landinu, þeir sem í dag heya stríðið við óblíð öfl náttúrunnar á vorum grimmu norðlægu höfum, eða í hinum dreifðu, kuldalegu bygðum landsins, — hvert er þeirra svar þegar þeir spyrja sjálfa sig í dag hversu lángt sé komið frelsisbaráttu vorri: Er ég frjáls maður í þessu landi? Ert þú frjáls maður í þessu landi? Er þjóðin orðin frjáls, þótt ríkið sé að nafninu til sjálfstætt?"

Fólkið verði frjálst

"Nú er ekki óhugsandi að einhverjir séu til sem hafa búið sér til kenníngu um það, að frjálsir menn séu allir þeir sem ekki eru lokaðir inni í tukthúsinu; að frelsið sé falið í því að vera ekki í tukthúsinu. En fólkið er á öðru máli. Kröfur þess til frelsis eru hærri en svo að það geri sig ánægt með það eitt að vera ekki í tukthúsinu. Fólkið er nefnilega líka heimspekíngar á sinn hátt. Það hefur undir niðri ákveðnar hugmyndir um mannlegan virðuleik, um virðuleik þess hlutverks að vera manneskja á jörðinni, og einmitt þessar hugmyndir um að vera maður og geta lifað einsog mönnum sæmi, var, er og verður takmark og eðli allrar frelsisbaráttu.

Frelsisþrá fólksins er þrá þess til að lifa samkvæmt þeim hugmyndum sem það gerir sér um að mannlegum verum sæmi að lifa, þannig að heilbrigðar óskir þess, lífskröfur og lífshræríngar geti feingið fulla útrás í því samfélagi, þar sem það lifir. Að því sé leyft að starfa í landi sínu að því sem hverjum hentar best, og þó þannig að starf þess sé ekki unnið fyrir gýg, heldur meðal til að veita því þær nægtir til líkama og sálar sem eru óhjákvæmilegar til þess að persónuleiki mannsins fái að njóta sín.

Frjálsir menn eru þeir einir sem lifa í alsnægtum, starfa skynsamlega, farsælu starfi í þágu sína og félagsheildar sinnar, en hafa þó fult næði til að ástunda gjafir andans, og geta komið börnum sínum til fylsta þroska. Þannig lifa frjálsir menn. Þannig lifir frjáls þjóð. Það er þetta, að lifa eins og mönnum sæmir, sem fólkið á við þegar það rís gegn kúguninni og berst fyrir frelsi sínu".

Frelsi til að lifa eins og mönnum sæmir 

"Í dag er dagur hinna mörgu, en ekki hinna fáu, dagur fólksins, sá dagur sem er tileinkaður málstað fólksins, frelsisins til að lifa eins og mönnum sæmir.

Það er í dag sem sjómaðurinn á að svara þessari spurníngu: Ert þú frjáls maður? Er skynsamlegt hlutfall milli baráttu þinnar við þetta dutlúngafulla haf, milli lífsbaráttu þinnar yfirleitt, og þess hlutar sem þú berð úr býtum til þess að veita fjölskyldu þinni og sjálfum þér þá aðbúð sem mönnum sæmir? Taka þau á móti þér með áhyggjulausu frjálsu yfirbragði í rúmgóðum húsakynnum, björtum og hlýum, þegar þú kemur heim eftir að hafa lagt fram starfskrafta þína í þágu samfélagsins? Eruð þið frjáls að því að uppfylla allar kröfur ykkar til lífsins?"

 

Komið börnum til þroska

"Getur þú komið börnunum þínum til fylsta þroska einsog frjáls maður, þannig að alt hið sérstaka sem í þeim býr fái skilyrði að eflast og mentast, hvert í sína átt? Og hefur þú sjálfur hið nauðsynlega næði auk starfs þíns, til að leggja stund á gjafir andans, einsog þú þráðir svo oft þegar þú varst úngur? Eða hefur kanski grimmur ógnahrammur lagt hald á hlutinn þinn undir eins og þú hafðir sótt hann í gin hafsins? Kemurðu kanski heim í lélegan kofa eða kjallara til konu þinnar mæddrar, og barna þinna, sem eru því mjög fjarri að njóta hins fylsta þroska? Kanski þú hafir ekki einusinni frelsi til að hita sæmilega upp hjá þér í vetrarkuldanum! Og þá líklega lítið næði til að njóta þeirrar ánægju af gjöfum andans sem þig dreymdi oft þegar þú varst úngur, vegna áhyggju og kvíða fyrir komandi dögum um hvernig þú eigir að klæða hópinn þinn, hvernig þú eigir að standa í skilum með húsaleiguna, eða með hvaða aðferðum þú eigir að létta á skuldinni þinni, ef þú skyldir vera einn af þeim sem ekki hefur verið leyft að stunda atvinnu í vetur, kanski lifirðu í atvinnuleysi sem er jafnvel ennþá óskynsamlegra en hinn versti þrældómur? En þú ert þó vonandi ekki einn af þeim sem getið var um í Alþýðublaðinu í fyrradag og sagt að gætu ekki einusinni uppfylt þá frumstæðustu og lægstu lífskröfu, kröfuna um nóg viðurværi, — þú ert vonandi ekki einn þeirra manna, sem hafa ekki einu sinni verið matvinnúngar yfir hásumarið, einn þeirra sem hafa ekki einusinni frelsi til að borða kjöt?"

Upp til dala - út til stranda 

"Upp til dalanna, lángt upp til landsins bakvið þessi hvítu fjöll, situr bóndinn og fólk hans í dag við útvarpið sitt og bíður eftir örvunarorði á þessum degi frelsisins, sem einnig er dagur hans. Einnig hann á að gera upp við sjálfan sig í dag svarið við þessari spurníngu: Bóndi, hvar er komið frelsisbaráttu þinni? Ert þú frjáls maður? Lifir þú í nægtum sem samsvara því erfiði sem þú hefur lagt á þig í sumar leið, því erfiði sem þú leggur á þig í vetur? Er húsið þitt, búið þitt og jörðin þín í því ástandi að það samræmist þeim kröfum sem þú gerir þér um frjálsra manna líf, — ekki manna sem hafa það eitt að fagnaðarefni að vera utan tukthússins, heldur frjálsra manna í orðsins fylsta skilníngi? Eða ber þú kanski kvíðboga fyrir að þú munir missa þetta alt þegar minst varir? Hefur þú kanski glæpst til að fullnægja frelsisþrá þinni, þrá til veglegra og virðulegra lífs, með því  að snúa þér til lokkandi lánsstofnunar svo þú gætir bygt, og hefur þú komist að þeirri niðurstöðu að þessi lánsstofnun var erkióvinur þinn, sem beið eftir tækifæri til að standa yfir þér með reidda svipu kúgarans til þess að hegna þér einsog glæpamanni fyrir það að þú vildir lifa einsog frjáls maður í húsi?

Var það þá glæpur lífs þíns að vilja lifa einsog mönnum sæmir, að þú vildir reyna að veita þér og þínum nokkrar þær unaðsbætur í lífinu sem gerðu hlut þinn sýnu veglegri en melrakkans í greninu, — var það þá glæpur þinn?"

 Ertu orðinn þræll lánastofnana ?

"Ertu kanski fyrir bragðið orðinn þræll fjandsamlegra lánstofnana, þessara lánstofnana sem eru svo fjarri því að vera stofnanir bænda og vinnandi lýðs á Íslandi, að þær vaka yfir hverri hreyfíngu þinni til þess að draga til sín arðinn af striti þínu jafnóðum, en hóta að öðrum kosti að reka þig frá húsi og heimili og gera þig og börn þín að rótlausum umrenníngum og betlurum á eyrinni?

Hefur þrá þinni til að verða frjáls maður verið refsað svo, að nú er komið fyrir þér áþekkast nestislitlum óbótamanni á flótta í óbygðum, — fjórtán til sextán tíma daglegur þrældómur þinn hefur verið verðlaunaður aðeins með hækkandi matarskuldum í versluninni og óframúrsjáanlegum vaxtaþrældómi þar sem hús þitt, jörð þín og bú er að meira eða minna leyti veðsett því bánkavaldi sem er alt annað en vald þitt, sem er vald höfuðóvinar þíns, fjármálaauðmagnsins, í staðinn fyrir að vera þitt eigið vald, þinn eiginn bánki, ríkisbánki verkamanna og vinnandi bænda, þitt eigið verkfæri til að afla þér frelsis.

Þú hefur helsti seint orðið sjálfstæðismaður — þú hefur séð um seinan að bánkavaldið, fjármálaauðmagnið, er ekki bánkavald verkalýðs og vinnandi bænda, heldur framandi vald sem þér er fjandsamlegt, sem mun halda áfram að vera höfuðóvinur hins vinnandi fólks til sjávar og sveita meðan þeir hafa ekki gert það að sínu valdi, meðan ekki er hrein alþýðustjórn í landinu, meðan bánkarnir eru ekki, um leið og framleiðslugögnin öll, yfirlýst eign verkalýðs og vinnandi bænda.

Þetta er sjálfstæðismál íslensku þjóðarinnar.

Það eru áhugamál hins framandi fjármálaauðmagns sem í svipinn setja íslensku fólki stólinn fyrir dyrnar og halda því undir svipu kúgarans í dag og hljóta að skipa sjálfri landstjórninni fyrir verkum, alveg einsog það var framandi vald sem lagði stjórnlagafrumvarpið fræga fyrir þjóðfund íslendínga árið 1851, þar sem farið var fram á að svifta landið sjálfsforræði og gera innanlandsmálefni þess að íhlutunarefni erlendra yfirdrotna, — og það var þá sem íslensk þjóðfylkíng sigraði í fyrsta sinn; þegar Trampe greifi ætlaði að beita þjóðfundinn gerræði, þá stóðu fundarmenn á fætur allir sem einn maður undir forustu Jóns Sigurðssonar og hrópuðu í einu hljóði: Vér mótmælum allir.

Það er satt, góðir íslendíngar, vér erum að nafninu til sjálfstætt ríki, en ef einhver hefur sagt yður að frelsisbaráttu þjóðarinnar sé lokið, þá er það ekki satt, fjarri fer því. Þótt það sé kanski ekki fyllilega rétt að segja, að nú fyrst sé hún að hefjast, þá er hitt sönnu nær að nú stendur frelsisbarátta íslensku þjóðarinnar sem hæst: íslenski maður, íslenska kona, taktu baráttuna upp í dag, haltu þennan dag sjálfstæðis og frelsis heilagan með því að sameinast þjóðfylkíngunni, samfylkíngu allra þeirra afla sem hafa eitthvert brot af málstað fólksins á stefnuskrá sinni, fylkíngu allra andlega og líkamlega vinnandi manna af öllum flokkum gegn hinu erlenda og innlenda kúgunarvaldi í mynd bánkaauðvaldsins, fjármálaauðmagnsins, þessum ægilegasta fjanda hins lifandi og stríðandi mannkyns á jörðinni, sem einnig á þessum dögum leitast við að leggja hramminn yfir land vort, á hvert einasta lifandi brjóst.

Íslendíngar, menn og konur af öllum flokkum! Í dag erum vér allir sjálfstæðismenn, í dag komum vér allir saman einum huga til að minnast frelsisins, til að nefna frelsisins heilaga nafn. Í dag ríkir aðeins einn málstaður í hugum vorum, málstaður fólksins, án tillits til allra flokkadrátta og sérhagsmuna.

Þjóðfylkíng, alþýðufylkíng, samfylkíng, — það er ekki nafnið sem skiftir máli, heldur einíngin um málstað fólksins gegn þeim öflum sem vilja meina fólkinu það frelsi til að lifa einsog mönnum sæmir, sem frá upphafi hefur verið æðsta og dýrmætasta takmark íslensk þjóðernis".

Það er ekkert við því að segja að flokkar haldi uppi ýmsum fánum til að leggja áherslu á sérkenni sín, einn haldi uppi fána hinna svonefndu íslensku lita, annar haldi uppi fána með örvunum þrem, þriðji með hamrinum og sigðinni. Það er aðeins á einum púnkti sem þessir fánar geta orðið hættulegir, og það er ef þeir í augum liðsmanna sinna fara að tákna eitthvað annað en baráttuna fyrir frelsi fólksins, frelsinu til að lifa einsog mönnum sæmir, — ef fánaberarnir ætla vegna aðdáunar á flokkseinkennum sínum að gleyma því sem öllum fánum er ofar, málstað hins lifandi, stríðandi fólks, hins vinnandi fólks til sjávar og sveita, málstað þess gegn kúgunarvaldinu í hverri mynd sem það birtist. Látum alla flokka slíta talinu um fegurð sinna ágætu fána eina stund fyrir kröfunni um eina órofna fylkíngu gegn þeim öflum og umboðsmönnum þeirra, sem vilja nú hneppa íslenska menn og íslenskar konur í nýa ánauð. Þjóðfylkíng, alþýðufylkíng, samfylkíng, — það er ekki nafnið sem skiftir máli, heldur einíngin um málstað fólksins gegn þeim öflum sem vilja meina fólkinu það frelsi til að lifa einsog mönnum sæmir, sem frá upphafi hefur verið æðsta og dýrmætasta takmark íslensk þjóðernis". ( leturbreytingar og millifyrirsagnir JB)

Birtist í Dagleið á fjöllum, 1937

 

 

Landbúnaður og matvælaöryggi Íslands

Á málþingi um þjóðarör­yggi og full­veldi sem fram fór í Hörpu um helg­ina fjallaði Ólaf­ur Ragn­ar um stöðu bænda og að mat­væl­in væru einn mik­il­væg­asti þátt­ur­inn í ör­yggi þjóða,

Landbúnaður og matvælaframleiðsla Íslends hefur átt undir högg að sækja innan íslenskrar stórnsýslu síðustu misserin. 

Ólafur Ragnar Grímsson fyrrverandi forseti  lagði sérstaka áherslu á matvæla og fæðuöryggi þjóðarinnar á fullveldisráðstefnu í Hörpu.  Þau öfl sem vilja gera  fullveldið að verslunarvöru og tala um í lítilsvirðingartón að hér sé um "teygjanlegt hugtak" að ræða  hafa einmitt sérstaklega veist að þessum atvinnugreinum þjóðarinnar.

Hefur græðgi og gróðasjónarmið einstakra fyrirtækja og einstaklinga  beitt sér hart gegn þessum meiginhagsmunum þjóðarinnar.

Ólafur Ragnar Grímsson  

Fram hefur komið hugmynd um að Ólafi Ragnari Grímssyni verði boðið að gerast sérstakur verndari landbúnðar og matvælaframleiðslu Íslands. Ljóst er að það þarf að bregðast hart við til verndar og sóknar fyrir innlenda matvælaframleiðslu. Það hefur sýnt sig á undanförnum árum að Ólafur Ragnar Grímsson er öflugur talsmaður þegar hann beitir sér.  Hugmyndin um að Ólafur Ragnar  gerist sérstakur verndari þessara greina  er góð og á að skoða nánar   

Ólafur hvattur til að gerast verndari

Framsókn hafnar Orkupakka ESB

 Línur skýrast í stjórnun orkumála og kröfum ESB. 

Miðstjórnarfundur Framsóknarflokksins samþykkti svohljóðandi ályktun: „Framsóknarflokkurinn hafnar innleiðingu þriðja orkupakkans. Orkuauðlindin er ein af mikilvægustu forsendum velmegunar í landinu.

Framsóknarflokkurinn áréttar mikilvægi þess að allar ákvarðanir í orkumálum verði í höndum Íslendinga og minnir á að stjórnarskrá Íslands leyfir ekki framsal ríkisvalds til erlendra stofnana. Aðstæður Íslands í orkumálum eru gjörólíkar þeim sem liggja til grundvallar orkulöggjöf ESB og því er óskynsamlegt að innleiða það regluverk hér. Auk þess hefur Ísland enga tengingu við orkumarkað ESB og Framsóknarflokkurinn hefur ályktað að slík tenging þjóni ekki hagsmunum landsmanna. Því ber að að hafna innleiðingu þriðja orkupakkans og semja við ESB um að Ísland verði undanþegið orkulöggjöf ESB"

Sjálfstæðisflokkurinn enn klofinn, Miðflokkurinn og Flokkur fólksins á móti

 Mikil andstaða er gagnvart innleiðingu Orkupakka ESB innan Sjálfstæðisflokksins og Miðflokkurinn er algjörlega andvígur. Sama er að segja um Flokk fólksins.

Vafalaust sjá auðmenn og ýmis fyrirtæki í bísness mikla gróðavon að fá að komast inn í orkusölu og orkuviðskipti til Evrópu. Og einhverjir eru tilbúnir að ganga erinda þeirra. Það er ekki nýtt.

Vg hlýtur samkvæmt grunnstefnu sinni að leggjast algjörlega gegn samþykkt og innleiðingu Orkupakkans

ESB- flokkarnir Samfylking og Viðreisn

Eftir standa ESB flokkarnir Viðreisn og Samfylking sem falla ávalt flöt fyrir óskum og kröfum ESB hverju nafni sem þær nefnast. En verða vonandi þar ein á báti